MJA-te'n Bairabi Tlawng lei dawh an enfiah Sorkar sum pek loh avangin harsatna tawk
Kolasib leh Mamit district-a MJA member-te chuan Inrinni khan Kolasib leh Mamit district inrina Tlawng lui, Bairabi-a lei dawh mek chu a hmunah an enfiah a; lei dawhtu contractor ABCI Ltd. hotute chuan, Mizoram sorkarin sum a pek theih loh avangin harsatna an tawh thu an lo hrilh.
District pahnih MJA-te tarlan danin, ABCI manager AK Singh chuan, lei dawh meka a ban lái chu thingluangin a sut chhiat avangin harsatna an tawk niin a sawi a, chu chu kum 2012 aṭangin siamṭhat tumin hma an lak thu te, tunah chuan harsatna sutkian a nih tawh thu te, December 2014 aṭangin hna thawh ṭan a nih thute sawiin, "May 2015 ral hmain zawh hman kan inring," a ti.
AK Singh chuan, hna an thawh tawh ang angah sorkarin pawisa a pe thei lo nia sawiin, "Hei vang hian harsatna kan tawk a, duh anga hna kan thawh chak thei lo," a ti.
MJA-te chuan, contractor an nih angin anmahni pawisa hmanga hna chu thawk mai turin an ti a; AK Singh erawh chuan, "Sorkar nen kan inremna ang a ni a, sorkarin an tih tur a la ti lo a ni," a ti. MJA-te chuan hna chu an vil reng tur thu sawiin, an beisei anga hna an thawk lo a nih chuan Court-ah zualko mai an tum thu an hrilh a ni.
Mamit leh Kolasib district-te'n Bairabi tlawng lei dawh an ennaa tel ve PWD executive engineer R Zirsangliana sawi danin, Tlawng lei dawh hna hi December 2008-a thawh ṭan a ni a, cheng vbc. 12.523 ruahman a ni. A ban lai bulṭhut chhia chu siamṭha turin phai aṭangin tui lût thiamte rawih a ni a, chumi hnuah kum 2012 aṭangin hmalak ṭan leh a ni.
District pahnih MJA-ten Bairabi lei dawh an ennaah hian Kolasib aṭangin DC Jitender Yadav, SDC Zoramsiama Hmar leh PWD EE B Lalhmingsanga te pawh an kal a; Mamit district aṭangin SDO (S) C Lalsangluaia leh SDC pahnih, Kawrthah PWD EE R Zirsangliana leh PWD JE-te an kal bawk.
MJA-te hian Bairabi leh Kolasib inkara lei min vanga kawng chhe laite DC hoin an en nghal a; kawng siam nan cheng vbc. 2 sorkarah dil mek a nih thu, PWD EE B Lalhmingsanga chuan a sawi.