A landan angin teh suh Rocker rapthlak aṭangin Pathian thu zirtirtu

A vanglai, kum 1960 chho, 1970 velahte kha chuan a hla thu leh stage-a a khawsak dan maksak tak tak avangin khawvel sawisel a hlawh ṭhin. Mitthi ruang ngaihzawn leh tharum thawhna chawilara an puh, stage-a lu tanna khawl (guillotine) lehmihring taksa chan sawm tur lem nena inchhawp rup ṭhin Alice Cooper kha tunah chuan Bible zirtirtu a ni tawh tlat!

Stage-a a inchei dan ṭhin te rei ruai kha, en mai chuan mihring pawh ni loin, hramhmun palai zinga a rothap leh hrat khawkheng ber emaw tih mai tur, a chet dan leh khawsak dan aṭang renga nu leh pa tam takin a concert-a an fate kal an khap ṭhin ngei mai, shock rocker chhuak hmasa Alice Cooper hi tunah chuan Kristian Piangthar tia inchhal ngat tawh a ni. Alice Cooper tia hriat lar, Vincent Damon Furnier hian stage-a thu rapthlak pui pui a chhak chhuah ṭhin chu a kalsan tawh a, tunah chuan Bible study-na hmunah Pathian thu ṭha tak tak a chhak chhuak tawh zawk ṭhin.

Hunawl a neih phawt chuan Bible study-na hmunah a kal ngei ngei a, "Bible study-na hmunah mi ka zirtir ṭhin. Kei chu substitute ang deuh ka nia, midang an rawn kal loh chauhin ka zirtir ṭhin," tiin Christian Post a hrilh. "Mite hmelah en ṭhin ang che. 'Alice chuan Bible class-ah a zirtir maw? Ani te chu Ramhuai nau kha a ni lawm ni?' Mahse tunah chuan mipuiin thil an hre taw...Alice chu character pakhat mai a ni. Alice chuan inkhawm a hua a, kei erawh chu Pathianni tinin ka inkhawm ṭhin," a ti.

Bible class piah bakah hian Cooper hian Solid Rock Teen Center a din a, he center hi $mtd3 zet senga a siam a ni a, hetah hian ṭhalai, nun kawng hrang hranga harsatna neite an enkawl a, an zirtir a, an ṭanpui ṭhin a ni. He center hi Arizona-a a din a ni.

A hmun a changtlung hle a, square foot 20,000 zeta zau a ni a, recording studio a awm a, indoor basketball court a dah a, rock climbing tihna tur a awm a, coffeehouse te, game room te, concert hall-te a awm vek. Cooper chuan, "Phoenix chhim thlangah hian mi hi an mu mai mai lo. Helai chhehvelah hian thil tam tak a virvel reng a, meth a hluar em em a, gang chi hrang hrang a awm bawk. Hetiang hmunah hian naupang nia kan ngaih tam tak leh kum 12, 13, 14 vel lek lekte a thusa pawl an ni," tiin an rawngbawlna hmun leh a chhehvel a sawi.

Cooper chuan, "Khawvel hi kan ta a ni lo a, Setana'n a nei a ni. Kan chenna khawvel hi ni tinin inbeihnain a khat a, Krista i nuna i neih loh chuan nang ngei pawh a tuartu i ni ngei ang," a ti.