Zu zuar turte thlan an ni tawh Zu man tur bithliah a la ni lo

Mizoram sorkar chuan Aizawla zu zuar chhuaktu (retailed wineshop) leh zu dah khawmna (bonded warehouse) tur a thlang fel tawh. Hetih lai hian, Mizorama zu zawrhna man tur erawh bithliah a la ni lo.
Bonded warehouse siam tur hian RTP Enterprise leh SS Enterprise thlan a ni a; retailed wineshop siam tur chuan mimal thlan a ni lo a, MIFCO, ZIDCO, MAMCO leh Ex-Servicemen-te thlan an ni. MIFCO-in hmun pathumah an zuar ang a, ZIDCO, MAMCO leh Ex-Servicemen ten hmun khatah ṭheuh an zuar ang.
Vanglaini thu dawn danin, Mizoram sorkar chuan zu aṭang­in chhiah chi thum - basic advalorem (excise duty), import permit fee (IPF)/export permit fee (EPF) leh, value added tax (VAT)-te lak a tum. Chhiah lak zat tur hi bithliah a la ni lo a, tihfel a nih hnu leh company-in zu an supply theihna tur rate an tihfel hunah zu man tur chu bithliah a ni ang.
Bonded warehouse neitute hlawh tur chu company nena inremsiam tur a ni. Mizoram sorkar chuan retailed wineshop neitute chu zu man aṭanga chhûta 20% aia tam an hlawh a remti lo a, an hlawh zat tur chu la tihfel tur a ni.
Mizorama zu supply turin company pahnih - Seagrams leh APB-te thlan an ni tawh a, company dangte nen pawh Mizoram sorkar chu an indawr mek a ni.
Seagrams hian zu man to deuh chi an siam ber a, APB hi chuan zu man tláwm deuh chi an siam tam thung niin Excise & Narcotics department hotute chuan Vanglaini an hrilh.
Zu zuar tura thlan MAMCO hotute chuan Vanglaini palai zawhna chhangin, Chanmari venga zuar tura tih an nih thu an sawi a, "Kan dawr luah tur erawh kan la ti fel lo a, kan zawng mek," an ti. Ex-Eervicemen chuan Treasury Square-a anmahni building-ah zu dawr siam an tuma thu dawn a ni.
ZIDCO chuan an zu zawrhna tur veng an la thlang fel lo. ZIDCO hotute'n Vanglaini an hrilh danin, zu zawrhna hmun tur an zawng mek a, Millennium Centre pawh a rem dawn leh dawn loh an en thlithlai a ni. Zu dawr pathum siam tur MIFCO pawhin an zu zawrhna hmun tur an buaipui mek nia thudawn a ni.