Khawthlir
Hnathawh thlirho
Rural Development department-a officer-te chuan nimin khan RD directorate conference hall-ah an hmalakna hrang hrangte thlirletna hun an hmang. Meeting hi RD secretary Lalrinliana Fanai-in a kaihhruai a; RD hnuaia cheme hrang hrang - MGNREGA, SAGY, IAY, BADP, IWMP, BRGF leh NRLM hnuaia kum 2014-15 chhunga hnathawhte an thlirho a ni.
MNF bànsan
Mizoram MLA hlui Alak Bikash Chakma leh CADC MDC hlui Anil Kanti Chakma-te chuan nimin khan MNF aṭanga bânna an thehlut. AB Chakma leh AK Chakma te hian political party dang zawm tumna an neih loh thu an sawi.
MZP-in dem
MZP headquarters, Champhai chuan thuchhuah siamin, tun hnaiah Zote Middle School zirtirtu pakhatin a zirlai naupang 14 chu mipat hmeichhiat rawngkaiin a khawih niin an tarlang a, an dem tak zet thu an sawi a; police-te'n pawi khawihtu zirtirtu an man chu lawmawm an tih thu leh, dan anga na taka hrem an phût thu an tarlang bawk.
Assembly session
Governor Dr Aziz Qureshi chuan, Mizoram State Legislative Assembly pasarihna session vawi ngana chu March 17, 2015 zing dar 10:30 a neih ṭan turin a ko.
DMR ruat
Mizoram sorkar chuan, Ramhlun Sports Complex leh Ramhlun Vengthara lei tawlh venna atana Control and Mitigation of Landslide hna kalpui mek enkawltu executing department/agency atan Disaster Management & Rehabilitation department a ruat.
Lungin dêng hlum
Nimin chawhnu dar 1 vel khan Hrangchalkawn leh Zobawk inkar, Lungpuizawl quarry-a lung hâl perin Remsangi d/o Tingrea, Lungpuizawl a dêng hlum. Thu dawn danin, lung per hian Remsangi luah a dêng a, Lunglei Civil Hospital panpui a nih hnuah, a hliam tuar loin chawhnu dar 2:30 velah a thi.