Tui sem a rualkhai zawk theihna turin SIPMIU-in Aizawlah pipe an phûm mek

Aizawla tui connection inpek kualna tur ṭha zawk siam mek a ni a, SIPMIU kaltlangin Asian Development Bank (ADB) sum hmangin contractor hrang hrangin an thawk. Km. 90 (metre 90,082)-a thui siam turah km. 15 (metre 15,402) thawh tawh a ni.

Aizawla tui sem kualn tur ṭha zawk siam mek hi contractor panga - M/s SS Construction, Chaltlang; M/s Tantia Construction Ltd, Kolkata; M/s Johnson Diesel Sales & Services; M/s Aman Enginering Works, Jalandhar, Punjab leh M/s EMC Ltd., Kolkata ten chan bik neiin an thawk a ni.

SS Construction hian an chanpual, 'Construction of water reserviours' chu an thawk zo tawh a, Johnson Diesel Sales & Services pawhin, 'Supply, installation & communication of booster pumps' chu an thawk zo tawh bawk. Company dang pathumte chuan an hna ṭheuh an la thawk leh mek.

Aizawla tui semna tura hma­sawn­na turin project pahnih - 'Rehabilitation and extension of feeder mains & distribution network' tih leh 'Extension of feeding line' tih chu siam a ni a; ADB sum hmanga thawh niin, thawh khatna chu zawh fel vek a ni tawh a, tuna hna kal mek hi kum 2019-a zawh tur a ni.

SIPMIU hotute chuan, Aizawla tui semna tur pipe phûm thawh hnihna (Project-II)-ah hian Seventhday Tlang, Govt. Complex, Luangmual, Laipuitlang, Bawngkawn, Zemabawk-I, Zemabawk-II leh Mission Vengte a tuam dawn tih an sawi.

Govt. Complex bikah metre 3,791 (67%) zawh a ni tawh a, Luangmualah metre 3,992 (28%), Zemabawk I-ah metre 2,727 (22%) leh Zemabawk-II-ah metre 4,892 (47%) thawh a ni tawh.

SIPMIU hotute chuan, tui pipe phûm chu hman a nih hunah Pressure Reducing Valve (PPV) an dah dawn tih sawiin, PPV khawl chu tui sem rualna tur hmanrua a nih angin mipuiin rualkhai takin tui an dawng thei dawn an ti a, "Tuna tui sem danah chuan, a ruala pek laiin hmun hniam zawka awmte'n a híp na lo thei si lo a, heng zawng zawng hi PPV chuan rualkhai takin a veng dawn a ni," an ti.