Zorama'n Zohnathlak hel pawlte nena An inbiak chungchang a sawifiah

MNF president Zo­ramthanga chuan Cen­tral-a NDA sor­kar­in Zohnahthlak hel pawlte chu remna siampui ngei a tum niin a sawi a, "Zohnahthlak under­ground-te hi UPA khan kum ruk chhung ‘po­litical talk’ a neihpui lo a, inkahhai hmang ri­ngawtin a kalpui a ni," a ti.

Nimina Mizo Hnam Runa inkhawmah thu sawiin Zoramthanga chuan, February 5-7, 2015 chhunga Shillong-a a zinnaah Manipur-a Zohnahthlak hel pawl hrang hrang intêlkhawm United People Front (UPF)-te’n India sorkar nen inbiak remna an neih theihna kawng dappui tura an sawm angin a tel tih a sawi.

Zoramthanga chuan, Manipur-a Zohnahthlakte zingah inngeih lohna, inkahna leh tualthihna a awm ṭhin avangin Suspention of Operation (SoO) an kalpui ṭhin tih sawiin, "Sorkar laipui nen inbiakna mumal loa kal reng an ning a, remna tluantling an nghakhlel tawh hle a ni," a ti.

MNF president chuan, Mizoram ṭhenawm state buainate a reh theih chuan Mizoramin a chhawr hle dawn nia sawiin, "Myan­mar sorkarin underground-te nena inremna neih a duh tluk thoin, India pawhin Myanmar-a remna a awm a duh a ni," a ti a; khawchhak lam aṭanga India rama ralthuam tawlhrûk nasa lutuk a reh theih nan India-in Myanmar-ah remna a awm duh tih a sawi.

MNF senior vice pre­sident Tawnluia pawhin thu sawiin, Aizawl Municipal Council sorkar kal dan mualphothlak tak chu Congress sorkar vangah a puh a, "AMC sorkar kal ṭha lai chu Congress party hlang sorkar dintir duh vangin councillor ṭhenkhat an uire a ni," a ti.