Bangalore-ah training buatsaih dawn

Mizoram Skill Development Society (MSDS) chairman Haukhum Hauzel chuan nimin khan Aizawl Press Club-ah thuthar thehdarhtute a kâwm a; Larsen & Toubro (L&T) company nen ṭang­kawpin Mizo ṭhalaite tan training an buatsaih dawn tih a puang.

Haukhum Hauzel chuan, training an buatsaih tur chu 'Free Training-cum-Placement in Construction & Infrastructure Building' tih a nih thu a sawi a, "Training-ah hian pawl 10 pass lo pawh tel theih a ni. Thla thum chhung Bengalaru-ah training tur a ni a, thla tin stipend Rs. 1,700 leh free accomodation pek an ni ang," a ti.

MSDS chairman sawi danin, training zote chu L&T company-ah hna an thawk dawn a, thla khatah Rs. 8,000 an hlawh bakah, a thlawnin awmna an pe dawn a, provident fund leh medical facility-te pek an ni ang. Kum khat dan zelah kaisan zel theih a ni. Training duhte chuan February 12, 2015 hmain MSDS office-ah ngaihven theih a ni.

Haukhum Hauzel chuan, DoNER Ministry pawhin hmar­chhak ṭhalaite tan Cen­tral Institute of Plastic Engi­neering & Technology (CIPET), National Institute of Fashion Technology (NIFT) leh Ashoka Institute of Hospitality & Tourism Management leh ITDC-ahte a thlawnin training a buatsaih dawn thu a sawi bawk a, "February 18 thleng dil theih a ni a, Mizoram tan quota a hranpaa a awm loh avangin huntiam chhunga dilna thehluh a pawimawh," a ti.