Aizawl Civil Hospital-a ke tan tawh Tuirial bawlhhlawh paihnaah chhar

Nimin khan Aizawl khawpui bawlhhlawh paihna hmun, Tuiriala dumping ground-a bawlh­hlawh zingah mipa ke, khûp chin hnuai lam pakhat chhar a ni a; Aizawl Civil Hospital-a damlo ke tansak a nia hriat a ni. Police-te'n enfiahin an chhui zui a, mahse case siam a ni lo.

Thu dawn danin, bawlhhlawh paihna hmuna ke bung chhar hi police thlen hmain a hmutute'n an hâl a ni. Police-te'n enfiahin an chhui zui a, Aizawl Civil Hospital-a damlo ke tansak a awm tih hriaiin an finfiah tak hnuah case an ziak lut ta lo a; an finfiah chu a tâwk mai niin an sawi.

Hetih lai hian, Ai­zawl Civil Hospital me­dical superintendent Dr Rosangluaia chuan zawhna chhangin, bawlh­hlawh paihna hmuna ke bung chhar chu February 7, 2015-a damlo ke an tansak a nih thu a sawi.

ACH medical super­in­tendent sawi danin, ke bung chhar a nih thu an hriat veleh an chhui zui nghal a, bawlh­hlawh paihna hmuna kal Bawng­kawn police-te pawh biain, tihrîral a la nih loh chuan Falkawn incinerator-a hâl ral tura lak an duh tih an hrilh a; mahse police-te chuan hâl ral a nih tawh thu an lo hrilh a ni.

Dr Rosangluaia chuan, dam­dawi-in bawlhhlawhte paih dan turah an inzirtir reng thu a sawi a; chutih rualin, thawktu an inthlak kual ve reng avangin inzirtir thar reng a ngai tih sawiin, tun ṭuma thil thleng chu pawi an tih thu a sawi bawk.

Dr Rosangluaia sawi danin, Aizawl Civil Hos­pital bawlhhlawhte chu hmun hnihah paih ṭhin a ni a; bawlhhlawh pangngai (domestic waste)-te chu Tuiriala AMC bawlh­hlawh paihnaah paih ṭhin niin, in­zaina (operation) aṭanga taksa bung hrang an zai leh lâk chhuah, paih ngaite chu polythene engah khungin, Falkawna a hâl ralna hmun (incine­rator)-ah hâl ral ṭhin a ni.