AMC suasamah Congress sorkar puh

ZNP vice president K Liantlinga chuan, Mizoram sorkar chu Aizawl Municipal Council (AMC) suasamah puhin, "Chhim lama district council an suasam ang mai maia AMC a suasam hi a dik loin a zahthlak a ni," a ti.

Nimina ZNP office-a an party inkhawmah thu sawiin, K Liantlinga chuan, AMC sorkar chu MPC councillor-te'n an uiresan niin a sawi a, "Congress sorkarin AMC a suasam dan hi a lungawithlak loh hle. Kan khawpui ber a ni a, hetianga pamham taka tih a nih tawh loh nan Anti Defection Law hi kan Assembly hian siamṭha thuai se a ṭha ang," a ti a; AMC-ah inthlan a hnai tawh a, sorkarna siam ngei turin ZNP-in ṭan a la dawn tih a sawi.

K Liantlinga chuan, Delhi As­sembly inthlan dawna BJP-in ‘Vi­sion Document’ an tihchhuahah hmar­chhak mite ram páwn aṭanga pêm lut (immigrant) anga an tarlang chu BJP ngaihdan dik tak niin a sawi a, "An mi hmuh dan dik tak a ni a, rilru natna tur a awm lo, kan nihna dik tak a ni. Mizo hi Indian kan ni lo a, British hun laia India rama behtir kan ni. Mongolian kan ni a, anni chu Aryan an ni," a ti.