AMC sorkar paihthlak a ni Sorkar thar lakluh Feb. 12-ah

Aizawl Municipal Council (AMC) sorkar, chairman Zarzoliana kaihhruai chu nimin khan paihthlak a ni. AMC sorkar thar chu February 12, Ningani-ah lak luh a ni dawn a, chairman atan CT Zakhuma lak luh a ni ang.

AMC councillor pasarihte'n February 5, 2015-ah Aizawl DC hnena AMC chairman Zarzoliana'n thlawptu a ngah tawk leh ngah tawk loh fiah tura ngenna an thehluh angin, nimin khan AMC session hall-ah special session koh a ni a; session hi appointed councillor R Vanlalvena, Aizawl South-I bialtu MLA-in a kaihruai.

Chawhnu dar 1-a session ṭan a nih veleh INC councillor Lalzirliana'n AMC chairman Zarzoliana rin tawk lohna motion a pu lut a; chumi hnuah member-te chu thusawina hun pek an ni a, councillor 12-in thu an sawi.

MNF member Biak Than­sanga'n thu a sawi hmasa ber a, MNF member vek Lalmal­sawmi'n a dawt. Chumi hnu­ah chairman Zarzoliana (ZNP), Lalsawivunga (MPC), Rosiamngheta, Zamanthangi (MNF), Lalrimawia, Ramhlunsanga (INC), PC Lalruatsanga (MPC), AMC vice chairman Lalrinenga Sailo (MNF), Lalchhuanmawii (ZNP) leh Hmingthanzami ten thu an sawi a ni.

Zarzoliana chuan, AMC chairman nihna chu a kherh vang leh a duh vanga ni a ni lo a, Pathianin a dahna nia a ngaih thu sawiin, chairman-a dahtu Pathianin a dah chhuak leh mai dawn niin a sawi a; chairman thar tur CT Zakhuma chu duhsakna hlanin, "Ka lawmpui tak zet a, theihtawpin a kaihza ka veng ang a, ka ṭawiawm dawn a ni," a ti.

AMC sorkar hmasa ber mumal lo taka a awm chu pawi a tih thu sawiin Zarzoliana chuan, "A zahthlak ka ti a, AMC hmasa ber ka theih tak emaw ti ang hrima kan sawp kual hi min thlangtute min thlan dan a ni lo tih ka chiang a... Aizawl hristory-a kan chanchin duhawm lo tak a chuang kumkhua tawh tur hi pawi ka ti a, vanduaithlak ka ti a, AMC Chairman anga ka hun tawp darkarah hian Aizawl mipui zawng zawngte ngaihdam ka dil a ni," a ti.

AMC chairman kal chhuak ta chuan, AMC chairman a nih chunga executive councillor leh councillor te, AMC office-a thawk zawng zawngte ṭawi­awmnaah lawmthu a sawi a; chairman thar tur pawh ṭha taka thawhpui zel turin councillor-te leh AMC thawkte a chah a ni.

Zarzoliana hian AMC chairman a nihna aṭanga a bân thu a sawi nghal a, "Chairman ka nihna aṭangin ka inhnûkdâwk a, inbûk buai a ngai lo e," a ti. Mahse, meeting chairman R Vanlalvena chuan vote lâk a kaltlangpui a, councillor-te thusawi (voice vote) hmangin AMC chairman Zarzoliana chuan thlawptu a nei tam tâwk lo a, chairman aṭanga paih a nih thu a puang a ni.

Thu dawn danin, AMC sorkar thar leh chairman thar CT Zakhuma chu February 12 chhun dar 12-ah AMC session Hall-ah lak luh a ni ang. CT Zakhuma hi AMC chairman hmasa ber a ni a, July 2014 khan paih a lo ni tawh a ni.