HPC(D) te'n pawisa an khawn

February 9, Thawh­ṭanni zan dar 10:30 vel khan HPC (D) hel nia hriat mi pariat vel chu Khawpuar-ah an kal a; zirtirtu, retailer leh V/C-te kokhawmin, pawisa pe turin an phût .

Police aṭanga thu dawn danin, HPC(D) hel nia hriatte hian sipai kawr ang camouflage hain silai an keng vek a ni. V/C-te chu Rs. 50,000 pe turin an phût a, mahse an neih loh avanga Rs. 5,000 pek an tum chu an la duh lo a, a hnua Rs. 7,000 an pek chu an la ta a ni. Retailer hnenah Rs. 20,000 an phût a, a neih daih loh avangin a neih ang chhun a pe.

Khawpuara zirtirtute chu an thla khat hlawh aṭanga 5% thla tin pe ṭhin turin an ti a, mahse zirtirtute hian hlawh an la lak loh thu sawiin, pawisa hi an pe ve lo. Helte hian khaw chhungah hian silai vawi eng emaw zat an hmet puak a, mihring hliam leh thil tihchhiat erawh a nei loa thu dawn a ni.

HPC(D)-te chet dan hriat a nih velah Sakawrdai SDPO hoin Khawpuar leh a chhevela police-te'n Khawpuar an pan nghal a, mahse an thlen chuan helho hi an lo awm tawh lo. Khawpuara hel an awm lai hian, khaw chhehvelah pawh hel ṭhenkhat an awm nia thu dawn a ni.