Alluminium mistiri training

Mizoram Building & Other Workers Welfare Board leh Central YMA ṭangkawp chuan, nimin aṭang khan CYMA Hall-ah alluminium mistiri training an ṭan a; Labour, Employment & Industrial Training secretary Rod­ney L Ralte-in a hawng.

Rodney L Ralte chuan, inhlawhna zawng­in ṭhalaite'n khawpui an pan ṭhin tih sawiin, "Inhlawhna ṭha deuh hmu tur chuan thiam neih a ngai. Thiamna neite tan inhlawhna turah lungngaihna tur a awm lo," a ti a; Mizo ṭhalaite tana alluminium mistiri training buatsaih a ni chu lawmawm a tih thu a sawi.

Central YMA presi­dent Lalbiakzuala pawhin thu sawiin, Mizorama biak-in satute chu ring lo mite an ni ṭhin tih a sawi a, "Mizo ṭhalaite tana cement misitiri training buatsaih a nih hnuah hmun tam takah Mizo ṭhalaite ngeiin biak-in an sa tawh a ni," a ti a; training turte chu eizawnna atan mai bakah, ram leh hnam humhalhna a ni tih hriaa ṭha taka zir chhuak turin a fuih.

Alluminium mistiri training hian thla khat a awh dawn a, training chhungin Fredys Enter­prise, Chanmari-in training-a telte chhun thingpui in tur an tumsak ang. Training turin mi 215-in dilna an thehlut a, mi 36 thlan an ni.