Khawthlir

RTI Act zirho
Mizoram Information Commission leh Mizo Students’ Union, Thingsai buatsaihin nimin khan Thingsai community hall-ah RTI Act chungchang inhriathriatna neih a ni a, chief information commissioner Lal Dingliana'n a hmanpui. Lal Dingliana chuan, khua leh tuite'n an hriat duhte RTI Act hmangin an dil thei tih sawiin, "Sorkar hma-lakna leh hnathawhte mi tinin RTI Act kaltlangin an hrechiang thei tawh a ni," a ti.

Free clinic
39 Assam Rifles-te chuan, February 9 khan Teikhang khuaah 'Free medical camp' an buatsaih a, Mimbung, Hrianghmun, Depatlang, North East Khawdungsei leh Kawlbem aṭangin mi 650 vel an inentir. Damlote tan a thlawnin damdawi an sem nghal a ni.

MHIP-in chhuang
MHIP general headquarters chuan thuchhuah siamin, Lalchhanhimi d/o B Lalzenawna, Khawzawl khuain National Games 2015, Kerala-a neihah weightlifting (kg. 69)-a silver medal a la chu an chhuan thu an tarlang a; a kal zelna turah duhsakna an hlan.