AMC sorkar bûknaa councillor-te thusawi

Nimina Aizawl Municipal Council (AMC) sorkar ding mek leh chairman Zarzoliana bûkna inkhawmah member (councillor) tinte chu thusawina hun pek an ni a; chairman ni laiin a duh ang chena rei thu a sawi theih laiin, dangte chu minute nga hun pek an ni a, member 12-in thu an sawi.

MNF member Biak Than­sanga'n thu a sawi hmasa ber a, MNF member vek Lalmal­sawmi'n a dawt. Chumi hnuah chairman Zarzoliana (ZNP), Lalsawivunga (MPC), Rosiam­ngheta, Zamanthangi (MNF), Lalrimawia, Ramhlunsanga (INC), PC Lalruatsanga (MPC), AMC vice chairman Lalrinenga Sailo (MNF), Lal­­chhuanmawii (ZNP) leh Hmingthanzami ten thu an sawi a ni.

Biak Thansanga (MNF):

AMC Ward-XVIII bialtu chuan, AMC chairman an bûk tur chu thil ṭha zawk inher chhuahna tur ni se a duh thu sawiin, councillor-te lung­rual taka an thawhho laia party aṭanga nawr luih an ni ṭhin chu ṭha lo a tih thu a sawi a; mipuite'n councillor-te chu mi puitlinga an hmuh theih nan AMC inthlan leh hmaa thla ruk la awm tur chu sorkar tharin hmang zo tawh se a duh thu sawiin, sorkar thar tur chu ṭha taka hna an thawh theih nan duhsakna a hlan a ni.

Lalmalsawmi (MNF):

Ward-IV bialtu Lalmalsawm­i chuan, councillor-te'n AMC an tihmingchhe lutuk leh hna pawh thawk hman loa political ball-a an awm chu zahthlak a tih thu a sawi a; an kal dan chu AMC tharin chhunzawm lo se a duh thu leh sorkar thar lo piang tur chu ṭha taka thlawp an tum thu sawiin, duhsakna a hlan a ni.

Lalsawivunga (MPC):

Ward-XVI bialtu Lalsawi­vunga chuan, MNF, ZNP leh MPC-te nen an thawhhona titawp a, Congress party an thawhpui turah mimalah lung­awi lohna an neih loh thu a sawi a; MNF, MPC leh ZNP Coordination anga thawkho ṭhin ni mah se, party hrang an nih avangin harsatna neuh neuh a awm niin a sawi.

Rosiamngheta:

Ward-V bialtu councillor Rosiamngheta chuan, hun hmasa lama AMC sorkar paihthlak tumna leh paihthlak tawhnate sawi langin, nikum July thlaa chairman an paihthlak tawh chu a tho leh dawn niin a sawi a, "Phiarrûkna nena thil tih hi a tlo lo a ni," a ti. Politics institution man loa politics khel an awm nia a lan thu sawiin, "Politics hi lottery a ni lo a, mission a ni," a ti.

Zamanthangi (MNF):

Ward-VI bialtu Zamanthangi chuan, AMC chu a thangmawi lo hle a, 'chungu nung bûk tum ang' maiin mipuiin an ngai tawh niin a sawi a, "Thil ṭha kan duh tlang a, mahse thil ṭha tih erawh a har hle ṭhin. Mipui aiawh kan nihna hi hriatreng a va ṭha em... tun thil thlengah hian inzir ila a ṭha hle ang," a ti. Aizawlin politics-a hamṭhat tum lutukna a mamawh ber lo a, enkawltu ṭha a mamawh zawk thu a sawi rualin, chairman leh executive councillor thar turte duhsakna a hlan a ni.

Lalrimawia:

Ward-XIV councillor Lalrimawia chuan kum hmasa lam aṭanga AMC sorkar thlak chhan a hriatte a sawi lang a, "A tir bera kan dinnaah khan ding ṭhap ila chuan tun ang hi a awm lo ang. Aizawl pawhin tun aiin hma a sawn zawk ang," a ti a; AMC sorkar paihthlak a nih ṭhin danah inphiarrûkna a awm thu leh, inphiarrûkna chu tun an thlen chhan a nih thu a sawi.

Ramhlunsanga (INC):

Ward-XIX councillor Ramhlunsanga chuan, AMC councillor-te chuan ṭawngkain Aizawl an hmangaih a, mahse a takah chuan an hmangaih lo niin a sawi a; AMC sorkar paihthlak tak chuan hna a thawk ṭha tâwk lo hle nia sawiin, "Awmze neia kal ṭha kan ti a ni," a ti.

PC Lalruatsanga (MPC):

Ward-IX bialtu PC Lalruat­sanga chuan, MNF, MPC leh ZNP-in AMC sorkar an siama an hnathawh leh hna an thawh dan chuan a kap hle ṭhin tih a sawi. An thawhhonaah khî a awma a lan tirhah party hotu lute'n sawi fel an tum lo nia sawiin, MPC party chuan thawhhona aṭanga inhnuhdawh an rel ta niin a sawi a, "Inhnuhdawh ṭha an tih avangin kan inhnûkdâwk a, kan thu a ni lo a, party thu a ni," a ti.

Lalrinenga Sailo (MNF):

Ward-I bialtu councillor Lalrinenga Sailo chuan, AMC-a thil thleng chu democracy ram a nih angin a hun a thleng leh taa ngaih mai ṭha a tih thu sawiin, "Heng thil thlengte hi nakin zela kan inzirna tur ni se, nakina AMC sorkar nghet a dinna tura inzirna a ni," a ti. AMC vice chairman chuan, thiam chan tuma thu sawi dawn chuan sawi tur nei ṭheuh an ni tih sawiin, thu an sawi tawhte chu inhrethiam tlang turin a ngen a, "Sorkar thar lo piang tur hi duhsakna ka hlan a, harsatnain a tlakbuak tawh loh ka beisei," a ti bawk.

Lalchhuanmawii (ZNP):

Ward-XI bialtu councillor Lalchhuanmawii chuan, councillor zawng zawngte'n AMC chu him takin kal se an duh a, mahse an chhuahna a inan loh avangin an duh angin a kal lo a, a buai ta niin a sawi a; AMC sorkar thar piang tur chu duhsakna hlanin, "Ward tinah hmasawnna rualkhai takin kal se. 'Sem sem dam dam, ei bil thi thi' tih rilru pua kal turin duhsakna ka hlan a ni," a ti.

Hmingthanzami:

Ward-II bialtu Hmingthanzami chuan, nghet lo leh mumal lo taka AMC a kal chu pawi a tih thu sawiin, AMC a kal tluan loh chhanah insawichhia a, inpuhmawh tur leh insawi fihîim tur bik an awm loh thu a sawi.