NLUP an tlâkpui dawn: Zoramthanga

MNF president Zoramthanga chuan, Congress party-in NLUP an tlinpui a, an tlakpui leh dawn niin a sawi.

Zoramthanga hian nimina Mamit East Block MNF Conference, Lengpui Venglai hall-a neihah thu sawiin, "Congress party-in NLUP kan tlinpui an tih hi an tlakpui dawn. Sum heti zozai party induhsakna bila an hmang te, NLUP beneficiary list-a chuang, a taka mihring awm lo tam tak pe anga an insawite hi NDA sorkar khuan a thlir mai mai lo ang," a ti.

Congress party chu an bupui ber Delhi-ah pawh mipuiin an duh tawh lo nia sawiin, Zoramthanga chuan, "An buzáwl bera van vâwr zawnga inkar bungbu tawh chung hian, a zár ṭang a hring reng thei lo. Kum 2018 hi kan nghak thleng a nih chuan Congress sorkar chu beih tham an awm tawh lo ang," a ti a; Mizorama Congress party chu Delhi lam puihna lo chuan an nung zo lo niin a sawi.

Congress sorkar mualphona lutuk tur hliah khuh nan Congress party-in MPC an dawr nia sawiin, Zoramthanga chuan, "VC, LC, AMC leh 2018 MLA inthlanah pawh ṭangho turin an dawr a ni," a ti a; AMC sorkar kal laiah MPC paih tumna a awm lo niin a sawi bawk.

MNF president chuan, MNF leh India sorkar inremna siam chu khawvel ram dang aṭanga ropui tia zir chian tlak an tih laiin, Mizorama Congress party-te erawh chuan an sawi nêp lui tlat niin a sawi a; remna thuthlung chu Pathian pek a nih thu sawiin, "Remna sawichhe ṭhinte hian Pathian an sawisel a, Pathian pawi an khawih a ni," a ti.