Tuivai Hydro Electric Power Project atan Sorkar leh NEEPCO-in inremna an ziak
Tuivai Hydro Electric Power Project khuah hna chu a tirah public private partnership (PPP) hmanga thawh tura tih ni mah se, PPP mode-a tih theih a ni dawn lo a, hei vang hian hna thawk turin NEEPCO thlan an ni.
Power & Electricity department hotute hnen aṭanga Vanglaini thu dawn danin, Tuivai HEP siam hna thawk tur hian global tender chhuah a ni a, tender chhangtute aṭanga contractor thlante chu Delhi-ah vawi eng emaw zat koh an ni a, mahse bank aṭanga pawisa an hmuh theih loh avangin hna an thawk thei lo.
Ministry of Finance-a Department of Economics Affairs (DEA) chuan megawatt 210 pe chhuak thei tur Tuivai HEP hi viability gap funding (VGF) hmanga PPP mode-a siam a remti a; chief minister Lal Thanhawla chhuan Tuivai HEP chu DEA pilot project niin a sawi.
Tuivai HEP hi VGF hmanga thawh a nih chuan, a thawhna man chu contractor leh state sorkar sum intum ṭâwm tur a ni a, Mizoram sorkar tum tur chu sorkar laipuiin a tumsak dawn a ni.
VGF hmanga HEP siam a nih chuan kum 35 chhung chu a siamtu company-in an enkawl ang a, pawisaa a hlâwkna pawh an chang dawn a, power siam chhuah zawng zawng chu Mizoram sorkarin unit khat Rs.3.22-in a lei dawn a ni. Mizoram hian a mamawh bak chu hmun dangah a hralh ve thei a; kum 35 hnuah chuan Mizoram sorkar ta liau liau tur a ni thung.
Power & Electricity hotute'n Vanglaini palai an hrilh danin, NEEPCO nena MoU an ziah ang chuan, Tuivai HEP ṭanga kawlphetha siam chhuahah Mizoram sorkarin 13% a chang dawn. 13%-ah hian 12 % chu state sorkar chan tur a ni a, 1% chu hydel project area vel hmasawnna atan hman tur a ni.
Power siam chhuah 25% chu Mizoram sorkarin a duh chuan a lei thei dawn a, hmun danga an hralh hmain 25% chin chu Mizoramin a mamawh leh mamawh loh NEEPCO a zawt hmasa tur a ni. Power leina man tur erawh tihfel a la ni lo.
NEEPCO hi Tuivai HEP thawh phalna sorkar laipuia dil turin kum khat hun pek an ni a; chumi hnu kum thum chhung chu Forest Clearance, Environment Clearance, etc. tihfelna atana hun pek leh an ni ang. Chumi hnu kum khat chhunga hna an thawk lo a nih chuan inremna thuthlung chu sût a ni ang. Hna thawh ṭan aṭanga kum nga chhunga thawh zawh tur a ni.
Tuivai HEP atana MoU hi State Guest House, Chaltlangah ziah a ni a, Mizoram sorkar aiawhin P&E secretary RK Gupta leh NEEPCO aiawhin chief managing director PC Pankaj ten hming a ziak.
MoU ziahnaah hian chief minister Lal Thanhawla chuan, kawlphethaah Mizoram a intodelh theihna atan leh hralh tham a neih theihna atan Mizoram sorkarin hmachhawp hrang hrang a neih thu a sawi a, "Rambuai vangin Mizoramah hmasawnna a khaihlak phah a, electric power-ah phei chuan Mizoram hian remchang kan neih ṭhat teh lul nen, vawiin thleng hian hnianghnâra êng chhit tur kan la nei lo a ni," a ti.