Line chhiat vangin êng a awm lo
February 10 zan khan Luangmual leh Zuangtui inkara 132kV line a chhiat avangin, Zuangtui 132kV station-in a châwm Aizawla veng ṭhenkhat leh khaw hrang hrangte'n Thawhlehni zan tir lam aṭangin kawlphetha an hmu lo a, nimin chawhnu dar 1:30 vel khan hmun ṭhenkhatah êng pek leh theih a ni.
Power & Electricity department chuan thuchhuah tarlan danin, Luangmual leh Zuangtui inkar 132kV line chu Power Grid Corporation of India (PGCI) enkawl a ni a, zana line a chhiat tirh aṭangin P&E leh PGCI-te chuan a chhe lai zawngin theihtawp an chhuah. Nimin zing dar 7:30 vel khan a chhe lai hmuh chhuah a ni a, PGCI chuan chawhma dar 11 velah an siam ṭha a ni.
Power supply a khaihlak lai hian 132kV sub-station pawh a theih ang anga siamṭhat ve nghal a ni a, chawhnu lam aṭangin a inchhâwkin kawlphetha pek chhuah a ni. P&E department chuan kawlphetha awm loh chhan hrethiam turin mipui an ngen a ni.