Khawthlir
Túr phultute man
Khamrang branch YMA chuan, February 10 khan an khaw rama Pualhrang luia tûr phûltu mipa pathum leh hmeichhe pakhat, Ramhlun Vengthar mi nia insawite an man. Khamrang YMA chuan, an ram chhunga lui chu an humhalh tih sawiin, dan phal loh hmanga nungchate man tum lo turin mi tin an ngen.
KVIB training
Mizoram KVI Board chuan nimin khan IPR conference hall, Aizawlah Entrepreneur Development Programme an buatsaih a, KVIC director Rualkhumi'n a hawng. Training hi PMEGP hnuaia bank hrang hrang aṭanga loan latute tana buatsaih a ni a, February 13-ah zawh a ni ang.
END-in zu man
Excise & Narcotics enforcement staff-te chuan, February 10 tlai khan Edenthar Vengah sap zu (rum) ûm puitling 288 an man a, zu phurhna motor, Eon car MZ-05 9935 leh mi pahnih an man nghal. February 10 vek khan END enforcement-te chuan Rangvamual leh Phunchawng ram hnuaiah zu siamna hmun an tichhia a, zu bilh lai ṭin 2,595, rakzu litre 70, zu thlawrna bel 18 an man bawk.
MJA Library pe
MJA Public Library-a dah atan VLC Vanlalhriatrenga'n a lehkhabu ziah 'Mizo mi ropui HK Bawihchhuaka' tih bu hnih a pe a, Chanmari West Branch YMA-in an silver jubilee souvenir bu khat an pe bawk. Lehkhabu petute chungah MJA chuan lawmthu a sawi a ni.
VC inthlan sawiho
Champhai District Level Standing Committee chu nimin khan Champhai DC Sangdingliana hoin DC conference hall-ah an ṭhukhawm a, village council inthlan lo awm tur chungchang an sawiho.
NLUP training
Mamit district chhunga Agriculture department hnuaia NLUP dawngtute tan, Thawhlehni khan Mamit Chhim Veng YMA hall-ah an hnathawh leh hmalak dan zirchianna hun buatsaih a ni.