Bilkhawthlir khuain kuhva aṭangin Cheng nuai 300 lakluh an inbeisei
Bilkhawthlir khuaa kuhva huan neitute chuan, kum 2014-15 chhung hian kuhva aṭang cheng nuai 244 chuang an lei tawh a, an la hralh mek zel.
Bilkhawthlir Kawnveng YMA president Lalmalsawma Ngente-in Vanglaini palai a hrilh danin, Bilkhawthlir khuaah hian chhungkua 1,200 vel an awm a; chung zinga chhungkaw 750 velin kuhva huan an siam a, chhungkaw 500 velin kuhva huan chu eizawnna pui ber atan an hmang.
Bilkhawthlira kuhva huan siamte hian nikum lam khan kuhva aṭangin cheng nuai 200 chuang an lei chhuak a, kuminah chuan an hralh tur ang ang an hralh zawh hunah chuan cheng nuai 300 vel an la lut theih turah an inngai tih, Bilkhawthlira kuhva huan siamtu pawl hruaitute chuan an sawi. Chhungkaw mala a hralh tam pawl chuan cheng nuai 10-15 man vel an hralh a ni.
Lalmalsawma Ngente chuan, kuhva Indian variety an tih chu an hralh zo tawh hlawm a, Assam variety an tih chu an la hralh chhuak lo tih a sawi. Indian variety hi tun hma aṭanga an chîn a ni a, tun hnaiah Assam variety a hlâwk zawk avangin an ching thar a, mahse Indian variety angin an la thar tam lo.