Buhchangphai ramri chinfel tumin Kolasib leh Hailakandi DC inbe dawn

Buhchangphai rama Ramthar Zaua Mizo leilet enkawltute Assam sorkar mite'n an tihbuai ṭhin chungchangah Kolasib DC Jitender Yadav chuan Hailakandi DC chu Kolasib-ah ngei inbiakpuiah a sáwm a; Mizorama V/C inthlan zawha inbe turin ruahmanna an siam.

Kolasib aṭanga thu dawn dan­in, Kolasib DC-in Kolasib-a Hailakandi DC inbiakpuia a sawmnaah hian, Hailakandi SP leh Hailakandi-a Forest Officer-te pawh tel turin a sáwm a; Kolasib-a media mite chu tel turin a sáwm bawk.

Zawhna chhangin Kolasib DC chuan, Hailakandi DC chu Kolasib-a kala inbiakpuia a sawmnaah hian ruahmanna thui tak an nei tih a sawi a, "Mizoramah V/C inthlan a hnai tawh a, Hailakandi-ah panchayat thlan a nih ve dawn bawk avangin, V/C inthlan zawh lamah ramri chung­changah inbiakna neih a ni ang," a ti.

Hetih lai hian, tun hnaia Ramthar Zaua Assam police-te'n thâwm an nei leha sawi chungchanga zawhna chhangin Kolasib SP RP Meena chuan, Ramthar Zau chu a area chhung a nih avangin Hailakandi SP chu a remtihna la hmasa loa Ramthar Zaua police luhtir tawh lo tura a hriattir thu a sawi a, "Kan phalna la hmasa loin Ramthar Zauah Assam police an rawn lang tawh lo ang," a ti.

Kolasib SP chuan, Hailakandi district-in SP thar an nei dawn tih sawiin, SP thar tur pawh chu Ramthar Zau chungchang a sawipui tawh thu leh, SP thar tur chu mi ṭha tak a nih avangin a (Kolasib SP) hriatpui lohin Ramthar Zauah hma a lak a rin loh thu a sawi bawk.