Power tarrif thar pawm lo turin Central YMA-in JERC a ngen
Central YMA chuan, Power & Electricity department kawlphetha chhit man tihsan tumna, Tariff Petition 2015-16 chu pawm lo turin Joint Electricity Regulatory Commission (JERC) for Manipur and Mizoram an ngen.
Central YMA chuan thuchhuah siamin, P&E department-in power tariff a siam thar, February 6, 2015-a chanchinbua an chhuah chu an theih ang tawk tawhin an zir chiang tih a tarlang a, "Nikum 2013-2014 khan power tarrif hi lo ennawn tawh a nih avangin, tuna ennawn leh nghal mai hi mipui dinhmun thlirin la ṭul rih loah ngaih a ni," a ti.
CYMA chuan, Aggregate Revenue Requirement (ARR) chhûtna hrang hrang (parameters)-te chu P&E department chauhin a chhût leh buatsaih a ni tih sawiin, "Páwn lam aṭanga enpuitu awm lo (un-audited) a nih avangin Central YMA chuan rin ngam har a ti a, chuvangin P&E department leh Central YMA leh hemi lama mithiamte (auditor) nena an chhût chhuah dan hi enfel phawt ni se," an ti a; behchhan mumal tak a awm avangin rawtna an thlen tih an sawi.
Power Tarrif Petition 2015-16 chu mipui hriat turin February 6, 2015 aṭang chauha tarlan a ni chu ṭha lo an tih thu sawiin, CYMA chuan, "Hmanhmawh tak leh hun tlemtê chauh mipui tana pek hi Central YMA chuan tha a ti lo a, chuvangin heti chung chuan Central YMA chuan power tariff thar (chhit man tihsan tumna) hi kalpui rih lo turin JERC kan ngen a ni," a ti.