MNF-in mipui venghim turin sorkar an phût

MNF party chuan thuchhuah siamin, Mizoram hmar tlangdung - Khawpuar leh a chhehvel khaw danga tunlaia hel pawlin silai an hmet puak leh tukluih chhiah an khawn chu an dem thu an tarlang a; Mizoram sorkar chu ṭawngka chauh ni lo, a tak taka mipuite himna tura thawk turin an phût.

MNF chuan, "Khawpuar leh a chhehvel khuaa helhoin silai hmet puak a, VC, retailer-te leh zirtirtute vaua sum an chhuhsak leh, intiamkamna neihtira ualau taka an chetna hi kan dem tak zet a. State ralmuang tia kan inchhuan laia dan leh thupek kenkawh ṭhat loh vanga mipui himna a derthâwng reng mai hi Home minister R Lalzirliana hian ṭawngkam chauh ni lo, a takin ram venhim hna thawk se kan duh tak zet a ni," an ti.

MNF chuan, kum ruk chhung Congress kaihhruai sorkarah hel pawl chetna a hluar thu te, tualthihna, kumtlinglo pawngsualna leh bawp chhar te, Mizoram khawthlang lama hmun ngai hlirah inrûkbo a hluar thu te, Buhchangphaiah Assam sorkar mite'n Mizo hnathawkte an vau reng thute an sawi a, "Home minister mualphona a tling tak zet tawh a ni," an ti.

MNF sorkar laia IR battalion pali lakte chu Mizoram himna atan sorkarin hmang ṭangkai se an duh thu sawiin, MNF chuan, hel pawlin tukluih chhiah an khawnna hmun, inrûkbo thlenna hmun leh Assam ramriahte hmang ṭangkai turin an chah a ni.