Khawpui leh thingtlanga lak luh inthlau tihbo nan Hand Holding kan kalpui dawn - Chief Minister

Chief minister Lalduhoma chu July 27, Inrinnia NITI Aayog Governing Council vawi 9-na, prime minister Narendra Modi kaihhruaia New Delhi-ah neihah a tel a; khawpui leh thingtlang mipui sum lak luh inthlau lutuk tihbo nan leh hna thar tam zawk siam a nih theih nan Hand Holding Policy an kalpui dawn thu a sawi.

CM Lalduhoma chuan, Mizoram mipui zatve aia tam khawpuiah an chên thu sawiin, "Khawpui felfai leh leilung chhiatna laka him, state hmasawnna bulṭhut ni thei neih kan mamawh. Khawpui leh thingtlang mipui lak luh inthlau lutuk tihbo nan te, hna thar tam zawk siam a nih theih nante Hand Holding Policy kan kalpui dawn a, hemi atan hian sorkar laipuiin special package-in Mizoram min pui se kan duh," a ti.

State Institution for Transformation of Mizoram atan NITI Aayog-in ṭanpuina a pek avanga a lawm thu sawiin Lalduhoma chuan, 16th Finance Commission hnena Mizoram mamawh an thehluhte chu Viksit Bharat 2047 a hlawhtlin theih nana thil pawimawh tak takte an nih thu a sawi.

Mizoramin state dangte aiin hmasawnna a kalpui tlai bik tih sawiin CM chuan, "Kan awmna a kilkhâwr avangin ni tin nun man leh hmasawnna hnathawhna man a sang bik. Nimahsela, mi dangte hnunga kal reng ringawt erawh kan tum hauh lo. Sustainable Development Goals tihhlawhtlinna lama kan kal chak dan hian state dangte ûm pha tura kan tumruhzia a tilang a ni," a ti.

Chief Minister chuan, Mizoram mamawh hmasa chu inkalpawhna kawng ṭha zawk leh tam zawk a nih thu a sawi a; Mizoram road density chu national avarage aia a la hniam bik thu te, zirna, hriselna, tui, kawlphetha, faina leh administrative infrastructure indaih lohna pawh a la nasat thute a sawi bawk.

CHIEF MINISTER SAWI DANGTE

- Viksit Bharat tihlawhtling turin remna leh muanna neih a ṭul hmasa.

- Mizoram hi international border pahnih karcheh, a ṭhenawm rama harsatna thlengte vanga chîm buai reng a ni.

- Security related expenditure kan dawn a rem lo a nih pawhin central sorkar hian peace dividend tal min ngaihtuahsak se.

- India hmarchhak state-te hian leilung awm dan avang te, infrastructure lama kan la hniam avangtein industry lian kan nei tlem.

- Sum hnár kan tlachham a, a bika kan harsatnate kan lo hmachhawnna tur - zalen zawka kan hman theih tur fund awm thei se.

- 10% GBS hi ministry tin hian inkaihhruaina mumal tak duang se, central PSU-te'n an CSR fund 10% vel tal hmarchhak state-ah hmang thei se.