Vawk suat zangnadawmna hmuh hun tur hriat a ni lo - AH & Vety dept.

Animal Husbandry & Veterinary department chuan vawk pùl hri, African Swine Fever (ASF) vanga kum 2023-a vawk suat neitute tan sorkar laipuiah zangnadawmna Rs 37,35,000 an dil a, sorkar laipuiin a rawn pek hun tur hriat a ni lo. Kumin thla nga chhunga ASF vanga vawk thi leh suat hlutna belhkhawm cheng nuai 7,906 a tling.

RTI Act, 2005 tlawhchhana zawhna AH&Vety department SPIO-in July 16, 2024-a a chhan danin, kum 2023 khan Mizoramah ASF vangin vawk 1,039 a thi a, vawk 928 suat a ni bawk. Vawk suat 928 neitu chhungkaw 225 tan sorkar Mizoram sorkarin laipuiah zangnadawmna Rs 37,35,000 an dilsak a ni.

Vawk suat neitute tana zangna­dawnna sorkar laipui aṭanga hmuh hun tur hriat a nih loh avangin vawk suat neitu chhungkaw 225 hnena zangnadawmna pek hun tur AH&Vety department chuan an hre rih lo.

AH&Vety SPIO chuan, data an neih tawh aṭanga zawhna chhangin, kumin January-May chhunga ASF vanga vawk thi hlutna chu cheng vbc. 22.3 a ni a, hemi chhung vêka vawk suatte hlutna chu cheng vbc 56.76 a ni. Kumin thla nga chhunga ASF vanga vawk thi leh suat zawng zawng hlutna belhkhawm chu cheng nuai 7,906 a tling.

January 1 aṭanga July 9, 2024 thlengin ASF-in Mizorama vawk vulhtu chhungkua 3,590 a ngawng a; nimin thleng khan Mizoramah vawk hri lênna khua/veng leh vawk thi a awm belh zel.

AH&Vety department chhin­chhiah chinah, kumin January 1 aṭanga July 27, Inrinni thleng khan ASF vangin vawk 7,627 a thi a, vawk 13,987 suat a ni. ASF lênna khua/veng 192 a awm tawh bawk.