Mizoram leh Assam inbe dawn

Mizoram sorkar leh Assam sorkar aiawhte chu state ramri chungchangah August 9, 2024 khian Aizawlah an inbe leh dawn.

Thu dawn danin, inbiaknaah hian Mizoram sorkar aiawhte Home minister K Sapdanga'n a ho dawn a, Home department hotute an tel ang. Assam sorkar aiawhte chu Border Protection and Development minister Atul Bora hoin an ni dawn a, Home Secretary leh official dangte'n an ṭawiawm dawn a ni.

Assam sorkar hian nikum 2023 kum tawp lam khan ramri chungchangah aiawh rawn tirh an tum a, mahse, Mizoram state assembly inthlanpui dawn hnaih a nih avangin Mizoram sorkar chuan kal rih lo turin a lo ràwn a ni.

Inbiakna neih tawha rêl angin Mizoram sorkar chuan khaw hrang hrangte a zir chian hnuah Assam sorkar enkawlna hnuaia awm mek khaw 62 chu Mizoram chhunga awm a ni tih Assam sorkarah an thlen tawh a; hemi chungchangah hian Assam sorkar aṭangin chhanna dawn a la ni lo.