Myanmar raltlan rawn luh belh

Tun hnaiah Myanmar aṭangin ráltlân mi 1,500 vel Mizorama district pangaah an rawn luh belh a, anni nen hian Mizoramah ráltlân 35,125 an awm mek.

Myanmar ráltlân rawn lut tharte hi Champhai district-ah tam berin, mi 1,293 an rawn luh belh anga chhinchhiah a ni. Champhai district chhim lama East Tuipui bial chhunga khawtlang hruaitute chuan vawi khata tam tak lut huk loin, an lut deuh reng niin an sawi.

Chin state khawpui Hakha leh Thântlang velah Myanmar sipai leh mipui sipaite an inkah nasat leh tâk avangin ráltlân an pung leh nia ngaih a ni.

Tun hnaiah Lawngtlai district-ah Myanmar aṭangin ráltlân 108, Siaha district-ah mi 77, Serchhip district-ah mi 14 leh Aizawl district-ah mi pakhat an rawn luh belh bawk.