Remna zawngin CNF leh ZRO an inbia

Chin National Front (CNF) leh Zomi - Reunification Organisation (ZRO) hruaitute chu July 27, Inrinni chhun khan ZORO vice president Lalmuanpuia Punte, MLA pisaah inremna kawng zawngin an inbia a, thuthlung an ziak nghal.

CNF leh ZRO-te hi May 2024 tìr lam khan inhmu thiam loin silai an chelek a, mi eng emaw zat an thih phah a ni. Chutianga unau inhmelhai chu ṭha ti loin palai hna an thawk tih tarlangin ZORO chuan, "ZORO chuan CNF leh ZRO-te inrem taka an awm theih dan a zawng a, inrem a nih theih nan inbiakna hmasa neih a ni ta a ni. Inbiaknaah hian thu tam tak sawiho a ni a, ngun taka sawiho a nih hnuah thawhhona thuthlung hmasa siam a ni," an ti. Inbiakna hi ZORO president R Sangkawia'n a kaihruai.

CNF leh ZRO THAWHHONA THUTHLUNG

Keini CNF leh ZRO-te July 27, 2024-a ZORO huaihawta inkawm khawmna neite hian uluk taka kan sawiho hnuah a hnuaia tarlante hi thinlung takin kan pawmin kan zawm tlang tih kan puang e.

1. Keini Zo fate (Chin-Kuki-Zomi/Mizo) hi thlahtu thuhmun, ṭawng khat hmang (same language - different dialect), nunphung thuhmun, serh leh sâng inkhawih pawlh, beiseina thuhmun vuana dam leh tlang khatah, thih leh ruam khatah ti ṭhin unau kan ni.

2. Kan ram leh hnam tana hma kan lakna kawngah kan ṭhahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh.

3. Inremna tluantling a awm theih nan a ṭul dan azira inbiakna neih leh ni se kan ti.