KHAWTHLIR

Indawr hun hawng

Minister Dr Vanlalthlana chuan July 27, Inrinni khan Laipuitlang Local Council House-ah a bial chhung mipui tana amah dâwr theihna hun a hawng a; a bial Aizawl North-II chhunga pawlte leh mimal eng emaw zatin an mamawhte an thlen. Minister hian Inrinni vek khan YMA, Ramhlun South Branch leh Laipuitlang Branch hnenah library-a dah tur lehkhabu eng emaw zat a pe bawk.

Zirlaite lawmpui

YMA, Serkawn Branch-a Education & Library Committee chuan July 27, Inrinni khan Serkawn Sikulpuiah Serkawna zirlai ti ṭhate chawimawina hun an buatsaih a, Lunglei High Powered Committee vice chairman V Malsawmtluanga, bialtu MLA-in a hmanpui. MLA chuan, Lunglei District Education Officer pisa nen ṭang dunin a bialah model school din tura hmalak a tum thu a sawi.

MDC ni zel dawn

Lai Autonomous District Council (LADC)-a ZPM MDC pahnih - LR Dingliana Chinzah leh N Zangura te chu Gauhati High Court Aizawl Bench chuan an dinhmun ngaia awm a, MDC ni zel turin a ti. MDC pahnih hian independent-a thlan tlin an nih hnua June 20, 2024-a ZPM an zawm avangin MDC an nihna hlihsak an nih lohna chhan tur sawifiah turin LADC chairman VL Hmuaka'n July 12, 2024 khan a hriattir a, July 18 thleng hun a pe. MDC pahnihte hi Gauhati High Court-ah an zualko a, High Court chuan status quo-a awm turin (an nihna ngai MDC ni zui zel turin) thutlukna a siam ta a ni.

Graduation Day

Hnahthial College Student Union chuan July 26, 2024 khan an college auditorium-ah Graduation Day cum Freshers' Social an hmang a, Hnahthial additional DC Zothanmawia Khiangte-in hmanpuiin, college magazine ‘Lawhleng’ a tlangzarh. Hnahthial College hi kum 1979-ah din a ni a; Mizoram University under graduate final semester exam hnuhnung berah zirlai 28 an hlawhtling a ni.