AMC sorkar thar a piang leh ta Chairman thar CT Zakhuma

13th February, 2015

Nimin chhun dar 12 khan Aizawl Municipal Council (AMC) sorkar thar a piang ta a; AMC chairman atan CT Zakhuma chu rinawmna thu tiamtira lakluh a ni.

AMC chairman leh a thawhpui turte lak luhna inkhawm hi nimin chhun dar 12 khan AMC Board of Councillors Meeting Hall-ah neih a ni a, Aizawl DC Dr Franklin Laltinkhuma'n a kaihruai.
Inkhawm ṭan veleh Aizawl DC chuan AMC chairman tur rawtna hun a hawng a; MPC councillor PC Lalruatsanga'n CT Zakhuma a rawt a, rawtna dang a awm loh avangin DC chuan CT Zakhuma chu AMC chairman a nih thu a puang. Aizawl DC hian CT Zakhuma chu AMC chairman turin rinawmna thu a tiamtir nghal.
MPC member C Lalsawivunga chu AMC vice chairman turin Rosiamngheta'n a rawt a, rawtna dang a awm loh avangin Aizawl DC chuan C Lalsawivunga chu AMC vice chairman a nih thu a puang a, rinawmna thu a tiamtir nghal a ni.
AMC chairman thar CT Zakhuma chuan executive councillor tura a thlan mi pathumte hming DC hnenah a pe lut a; DC chuan Lalzirliana (INC), Hmingthanzami leh Rosiamngheta-te chu executive councillor turin rinawmna thu a tiamtir nghal a ni.
AMC sorkar thar lakluhna inkhawm hian minute 15 chhung a awh a; AMC councillor-te an tel kim a ni.
AMC chairman thar CT Zakhuma chuan, AMC sorkar an thlak takte'n hmachhawp an neihte chu an theih ang angin an bawhzui zel dawn tih a sawi a, "Work programme-te leh thil dang hmachhawpte an nei a, thla kua leh tlem hun kan la neihah hian kan theih ang angin kan bawhzui chho zel ang," a ti.
CT Zakhuma chuan zawhna chhangin, AMC sorkar term hmasa ber chu miin hna thawk ṭha tawk loah an ngai a nih pawhin, bul ṭantu an ni a, zir chawpa kal an nih avangin chak taka kal a harsa niin a sawi a, chutih rualin, hna lian tham tak takte pawh an thawh thu leh hna kal mekte a awm thu a sawi.
AMC chairman chuan, councillor-te chu an inngeih tlang vek tih sawiin, "A tute pawh hi kan inngeih a, keimahniah harsatna a awm lo; party boruak a inrawlh hian kan tuar lo a ni ber mai," a ti. AMC Licensing Regulation leh Property Tax chungchanga zawhna chhangin, an bawhzui zel dawn a, mipuite phurrit lutuk lo zawngin an kalpui dawn thu a sawi bawk.
CT Zakhuma hi AMC chairman hmasa ber niin, July 2014 khan paihthlak a ni a, tun ṭum hi a vawi hnih chairman-na a ni. Executive councillor tura lak luhte zinga mi - Lalzirliana leh Hmingthanzami te pawh AMC sorkar hmasa bera executive councillor lo ni tawh an ni a; vice chairman C Lalsawivunga chu executive councillor ṭang lai a ni.