KHAWTHLIR
LSA-in êng duh
Lai Students' Association (LSA) general headquarters, Lawngtlai chuan thuchhuah siamin, February thla tawp lam aṭanga HSLC leh HSSLC exam lo awm turah zirlaite'n ṭha taka lehkha an zir theih nan ṭha taka electric êng pe turin sorkar an ngen.
Lung lumin delh
Nimin chawhnu dar 2:30 vel khan MacDonald Hill tlak lam aṭangin lung a lum a, a thlanga Chanmari West kawngpuia scooty tlan lai a delh. Scooty khalhtu H Suana, Chanmari West chu a mal bul lam ruh a deng tliak a, damdawi-in panpui nghal a ni.
PYD khawmpui
UPC (North East India) hnuaia district lian ber, Aizawl East District PYD chuan nizan khan Sailulak-ah inkhawmpui vawi 26-na an hmang ṭan a, Pathianni zanah a ṭiak ang.
College sak en
Parliamentary secretary TT Zothansanga chuan nimin khan Champhai College building sak meka hna thawh dan a enfiah.
B-Grade lawm
T Romana College chuan nimin khan Vanapa Hall-ah NAAC 'B' grade accreditation lawmna leh College Week kharna hun an hmang a, MLA R Vanlalvena'n a hmanpui.
Leimin thian dawn
Sorkar thuchhuah tarlan danin, February 16 aṭangin Rangvamual leimin paih hna thawh a nih dawn avangin NH-54 chu Ch. Chhunga Truck Terminal leh Lalruatkima Filling Station inkarah zing dar 6 leh tlai dar 6 chhungin khâr a nih dawn a, "Kawng khâr a nih chhungin MMV leh a hnuai lamte chu Sakawrtuichhun-Lungverh kawngah tlân theih a ni ang," an ti.
Damdawi zawrh dan sawiho
Lawngtlaia damdawi zuarte chu nimin khan Lawngtlai CMO conference hall-ah damdawi zawrh leh a kaihhnawih thil pawimawhte hrilhhriat an ni. Lawngtlaiah hian drug licence nei mi 39 an awm a, chung zinga 18 chuan dawr an nei lo a ni.