MI hnuaia Mizoram mamawhte thlen

February 10, 2015 khan Shillong-ah Union Water Resources minister Uma Bharti hoin Brahmaputra Board High Powered review meeting neihah chief minister Lal Thanhawla aiawhin Minor Irrigation minister Lal Thanzara a tel a; Mizoram mamawhte a thlen.

Sorkar thuchhuah tarlan danin, Lal Thanzara hian Mizorama leimin laka invenna leh leiminin a tihchhiat siamṭhat lehna project kalpui mek chak zawka kalpui a ṭul thu a sawi a; ei leh bara intodelhna kawnga awmze nei zawka Mizoram lui leh ruahtui chhawr ṭangkai chungchang te, sorkar laipui project-a state share 30% aṭanga 10% a tihtlem leh, Minor Irrigation leh Soil & Water Conservation hnuaia project hrang hrang kalpui dan turte a thlen bawk.

Brahmaputra Board hi Ministry of Water Resources hnuaia The Brahmaputra Board Act kaltlanga din leh mahni inrelbawlna hran nei thei tura thuneihna pek a ni a; India hmarchhak state hrang hrang chief minister-te chu member an ni.