Mizoram Post tana hming hawhtir lo turin ngen

Silchar aṭanga ni tin chanchinbu tihchhuah, 'Mizoram Post' publisher hming putu, CVL Ruata chu February 11 khan Central YMA-in an pisaah koin, Mizoram Post tana a hming hmantir lo turin an ngen.

Mizoram Post neitu, Silchar mite chuan a tirah Mizoram Post publisher atan Hrangkhuaia Ralte an hmang a, Central YMA-in a hming hmantir lo tura an ngen hnuah Hrangkhuaia chu a inhnûkdâwk a ni.

Kum 2012 aṭangin CVL Ruata hming an hmang leh a, CYMA hruaitute chuan September 2012 khan CVL Ruata chu kâwmin, a hming hawhtir lo turin an lo ngen tawh a; mahse CVL Ruata chuan YMA ngenna chu zawm loa tun thlenga a hming a la hmantir avangin CYMA hruaitute chuan an ko nawn leh ta a ni.

Central YMA hruaitute chuan, Mizoram Post chanchinbu chu Mizoram chanchinbu a ni lo a, a neitute pawh Silchar mi an nih avangin, publisher atana Mizo hming an hmang chu Mizo hming hawha Mizoram hmanga sumdawnna dik taka an ngaih thu an sawi.

Mizoram Post hi copy nuai khat dawn lai Mizorama sem angin sorkar laipuia Information & Broadcasting Ministry-ah report a ni a, Mizorama chanchinbu sem darh tam bera anga a lan avangin sorkar laipuiin Mizoram mipuite hriat atana a duhte puanzarna pui ber atan a hmang ṭhin. Hetih lai hian Mizorama an sem zat tak chu copy 300 vel a ni thung.

Mizoram Post vang hian Mizo ṭhalaite'n hamṭhatna leh remchang tam tak an hloh phaha ngaiin Central YMA hi Aizawl District Magistrate-ah an zualko a; Magistrate chuan record hrang hrang aṭanga chhuiin, CYMA zualkona chu a dik tih a finfiahna report I&B Ministry-ah thehlut a ni.

Sorkar laipui chuan Aizawl District Magistrate chu a ṭul anga action la turin a hriattir a, DM chuan Mizoram Post chu show cause notice pein tihtawp a nih loh chhan sawi turin a ti a ni. Aizawl DM hriattirna avang hian Mizoram Post neitute chu High Court-ah zualkoin, I&B secretary, Aizawl DC leh DAVP-te an khing a, High Court chuan show cause notice pawh a stay mek a ni.