CSC-te'n eirawngbawlna gas an sem dawn

Mizorama common service center (CSC)-te chuan July 16, 2024 khan IPR auditorium-ah an din champha vawi 15-na an lawm. CSC-te hian Indian Oil Corporation (IOC) hnuaia gas distributor-te nen inremna an ziak a, gas semtute awm lohnaah CSC-te'n gas an sem dawn.

CSC din champha lawmna hi chawhma lamah IPR auditorium-ah neih a ni a; village level entrepreneur (VLE) ti ṭha (CSC kalpui ṭha) thlan chhuah mi pahnih - Lalramdinmawia Hringngen, Aibawk, Aizawl district leh C Lalrindika, Kolasib district hnenah chawimawina hlan a ni.

Chawhnuah CSC-te leh India Oil Corporation hnuaia LPG distributor-te'n State Guest House-ah thawhhona thuthlung an ziak. Mipui awlsam zawk nan LPG distributor-te awm lohna khuaah CSC-te'n gas an sem thei tawh dawn a ni.

Inremna thuthlung ang chuan, CSC pakhatin distributor hnen aṭangin vawi khatah gas bûr sarih zel a la thei dawn a, gas connnection ti thar duh leh booking ti duhte pawh CSC hian an tihsak thei tawh ang.

Ministry of Information and Communication Technology hnuaiah kum 2009 khan mipuite'n awlsam zawka sorkar an dawr theih nan CSC din a ni a; tribal certificate, income certificate, residential certificate, Aadhaar card, banking, digipay, mini ATM, PAN card, mobile recharge, insurance hrang hrang, PM welfare scheme, agriculture, health, education leh skill, legal, grameen e-store, tours & travels leh a dangte an ti thei a ni.

Mizoramah CSC 1,126 a awm mek a, financial year 2023-24 chhungin CSC-te hian an service hrang hrang aṭangin cheng vbc. 69 vel an thawk chhuak niin sorkar thuchhuah chuan a tarlang.