AMC buai chhanah UDPA minister puh

MNF party chuan thuchhuah siamin, Aizawl Municipal Council sorkar a buai chhan leh harsatna thlen chhan bulpui berah AMC enkawltu department, UDPA changtu minister Zodintluanga an puh.

MNF chuan, October 2010-a ding ṭan AMC-in term khat pawh a zawh hmaa harsatna leh buaina an tawh zing lutuk chu pawi an tih thu an sawi a; a tira Congress leh ZNP thawh dun sorkar kal ṭha lai chu tluang takin term hmang tluan se MNF chuan a duh nia an sawi rualin, UDPA minister hmalakna avangin thil a kal tluang ta lo niin an sawi.

MNF, MPC leh ZNP-te'n thla ruk sorkar inṭâwm an siam chhungin AMC sum tur 13th Finance Commission aṭanga lo kalte chu state sorkarin a hun takah pe chhuak duh loin an hrêk ṭhin niin an sawi a, "AMC-in hna thawhna tur sum an neih ve ang angte chu Congress sorkar sum harsa tak hian ît thamah a ngai tlat a ni," an ti.

MNF chuan, sawp hlawh taka AMC a kal laia MNF councillor-te’n rinawm tak leh a thlang tlingtu mipuite zah tak chunga nghet taka an ding tlang chu an chhuang thu an tarlang bawk.