MNF-in Gas Bottling Plant tihlen tura MNF sorkar hmalaknate an sawifiah

MNF party chuan thuchhuah siamin, MNF sorkar laia hmalakna kal zelah Mualkhang Gas Bottling Plant tihlenna tur sum pek chhuah a ni ta chu lawmawm an tih thu an tarlang a; gas bottling plant a hlawhtlin ngei theih nan uluk taka vil zui turin ZPM sorkar leh FCSCA Minister an chah.

MNF chuan, MNF sorkarin theihtawp chhuaha hma a lakna kal zelah gas bottling plant lian zawk siamna tur sanction order July 22, 2024-ah Indian Oil Corporation Ltd. (IOC)-in Mizoram sorkar kutah a hlan tih an tarlang a, "MNF ministry-in ram mamawh belh ang lei belha lungphùm phùm mai theiha a lo peih vek hnuah Mualkhang Bottling Plant lian zawka siamna tur sanction order a chhuak ta hi lawmawm kan ti tak zet," an ti.

ZPM kaihhruai sorkar chu naupang chhe zia pu chunga sorkar kal tawhte puhchhiatna tur ringawt zawng lo a, puitlin lam pan turin an duhsak tih sawiin MNF chuan, "Mualkhang LPG Bottling Plant siam lenna leh siamṭhatna tur pawh hi ram mipui ni tin mamawh phuhrûkna tur ram rotling a nih ngei theih nan uluk taka vil zui ngei turin ZPM kaihhruai sorkar leh FCSCA Minister kan chah," an ti a; MNF sorkara chief minister Zoramthanga, FCSCA minister K Lalrinliana leh Revenue minister Lalruatkima hmalakna chhuanawm an tih thu an sawi.

MNF THUCHHUAH TARLANTE

- Hmalakna hmasa ber November 5, 2019-ah a ni a, IOC hotuten CM Zoramthanga leh FSCCA Minister an hmu a, LPG bottling plant siamṭhat leh tihlen dan tur an sawipui. CM-in an mamawh ram leh thil dangte ngaihtuahsak a tum thu a hrilh.

- Mualkhang Gas Bottling Plant hian Oil Industry Safety Directorate-in safety norms a siamte a phak tawh loh avangin January 19, 2020-ah tihtawp a ni.

- March 11, 2020-ah FCSCA Minister hoin Bottling Plant tharthawh lehna tur leh tihlen dan tur a hmunah an tlawh.

- February 9, 2021-ah Mizoram sorkar hmalaknain Mualkhang Gas Bottling Plant siamṭhat leh tihlen a nih tur thu puan a ni. Mizoram sorkarin Bottling Plant siam lenna turin ram hectare 2 chu cheng nuai 47-in a lei belh a, IOC hnenah a hlan.

- Bottling Plant tihlenna tura hmalakna leh indawrna kal zelah CM-in January 21, 2022-ah IOC chairman SM Vaidhya hnenah DO letter a thawn a, Bottling Plant tihlenna tura ram mamawh belh chu Mizoram sorkarin a peih tawh thu a hriattir.

- IOC Chairman-in February 2, 2022-ah CM lehkha a thawn lêt a, hma an lak zui dan tur te, Bottling Plant chu kum 2 chhunga thawh zawh tur a nih thute a tarlang.

- July 19, 2023-ah IOC hotute'n FCSCA Minister an hmu a; Mualkhang Bottling Plant-ah hna ṭan thuai a nih tur thu an hrilh.