Tourism Awareness Week hman ṭan a ni

July 27, Inrinni khan Tourism Awareness Week hman ṭan a ni a, Millennium Centre kawtah Tourism minister Lalrinpuii'n a hawng. Week hi August 3, 2024 thleng awh tur a ni a, thupui chu 'Tourism for all' tih a ni.

Tourism Awareness Week chhungin TV-ah talkshow buatsaih a ni dawn a; Sailam, Biate, Sairang, Sangau, Aibawk, Baktawng, Buangpui leh Ralvawng khuaahte Tourism Village Competition buatysaih a ni dawn. Mizoram pumah tourism chungchanga mipui hriat tur pawimawh inziahna pamphlet sem a nih dawn a; kár kawng leh tourism hmun hrang hrangah hoarding târ tum a ni bawk.

Tourism Minister chuan, Mizorama tourism tihmasawn turin a chhunga chengte an pawimawh thu a sawi a, "Tourism hmasawn theihna tam tak a la awm a, tourism chungchanga kan rilru puthmang leh kan dawnsawn danah hma kan sawn a pawimawh. Tourism kan ngaihtuah hian ram pawna mi kher beisei loin, ram chhung mi aṭang ringawt pawhin tourist ṭhahnem tak kan nei thei a ni, " a ti.

Khualzinte dawnsawn thiam a pawimawh thu sawiin Lalrinpuii chuan, "Mizote hian khualzinte dawnsawn dan kan thiam chuan khualzinte'n Mizoram nuam an ti ang a, lo kal nawn leh an châk zel dawn a ni, " a ti a; Tourism department kaltlangin Lengpui Airport-ah khualchhawn dah a nih thu te, website leh smartphone kaltlanga online-a booking leh payment kalpui mek tihchangtlun a nih thu te, training buatsaih ṭhin a nih thute a sawi.

Tourism Awareness Week hawnna inkhawm hi Tourism officer C Ramsangzuali'n a kaihruai a; Tourism secretary Dr Lalrozama, director R Lalrodingi leh Lengzem editor Vanneihtluanga te pawhin thu an sawi a, tourism pledge (thutiam) sawi rual a ni.