Inthlang turin kan inpeih - SEC Containment area-ah inthlang dawn lo
State Election Commission (SEC) hotute chuan, naktuk, August 27-a village council leh local council inthlan tur atan an inpeih tawh thu an sawi. Hetih lai hian, Covid-19 vanga containment area-a DC-te'n an puanna khua leh vengah chuan inthlan buatsaih a ni dawn rih lo.
Vanglaini palai zawhna chhángin state election commissioner (SEC) Laima Chozah chuan, naktuka VC leh LC inthlan turah an inpeih tawh thu a sawi a, "Hma lam hun kan hre lo, democracy ram kan ni a, chuvangin, inthlan buatsaih a ngai a ni. Grassroot democracy hian ngaih pawimawh a hlawh vak ngai lo a, ngaih pawimawh a hlawh telh telhin a rinawm," a ti.
Laima Chozah chuan, Covid-19 doin Health department-in theihtawp an chhuah tih sawiin, "Contact tracing-te neiin, a kái chhâwng thei tur àwma ngaihte chu endik zel an ni. Inkài chhàwn hlauhawmna deuh hmunte chu containment area-ah puan a ni," a ti a; boruak ṭha leh him tak hnuaiah inthlan buatsaih theih a nih ngei an beisei thu a sawi.
Covid-19 vanga sorkarin zawm tur a duante zawm a nih theih nan MPF leh YMA-te'n an pui dawn tih sawiin SEC chuan, "Mizoram chu India ram state dang angin kan bit lo a, chuvangin, inthlan pawh hlauhawm lutuk loa buatsaih theih kan inbeisei. Mipui him theihna atan theihtawp chhuah a ni dawn," a ti a; himna tura ruahmannate zâwm turin mipui a ngen.
SEC chuan, Kolasib district-a election official pakhat Covid-19 a vei tih hmuhchhuah chungchangah, "Kolasib DC-in chak takin hma a la a, a kài chhàwn theihawma ngaihte chu test nghal niin, an negative vek. Official turte thei lo palh an awm atan reserved a tirah neih sa vek a ni a, official-te chuan vote an thlâk vek theihna turin ruahmanna siam a ni," a ti.
Covid-19 vanga containment area-a puan khua leh vengahte August 27-ah inthlan buatsaih a nih dawn loh thu sawiin Laima Chozah chuan, "DC-te'n containment area atana an puana inthlan buatsaih luih hi kan tan tih chi a ni lo," a ti a; containment area-te tan bik chuan inthlan hun tur ruahman ṭhat a nih tur thu a sawi.
SEC chuan, quarantine mek, an result negative tawhte vote an thlak theih dan tur an ngaihtuah thu sawiin, "Mahse, Health department-in min puih a ngai dawn. Anni lamin min pui thei a nih chuan quarantine mek, negative tawhte hian vote an thlak thei ang," a ti.