Covid-19: Mizoram dinhmun Hripui vei hmuh belh zel a ni

Mizoramah August 24, Thawhṭanni khan Covid-19 vei mi 35 hmuh chhuah a ni a, an zingah Mizoram chhunga mi dang aṭanga kai chhawng mi 24 an tel. Nimin khan Vairengte-ah mi pathum hmuh chhuah a ni bawk. Mizorama hripui vei hmuh tawh zat chu mi 953 an ni a; nimin khan mi pathum chhuahtir an ni.

Nimin khan Covid Care Centre, SIRD Pukpui aṭangin Covid-19 vei dam tawh mi pathum chhuahtir an ni a, BSF sipai pahnih leh civil mi hmeichhia pakhat an ni. Sorkarin a tarlan chinah, Mizorama hripui vei hmuh chhuah tawh zat chu 953 a ni a, hetah hian nimin chhûna Vairengtea hmuh chhuah thar mi pathum an tel lo. Hripui vei tawh zinga mi 464 (48.69%) an chhuak tawh a, mi 489 (51.31%) an la chhuak lo. La chhuak lo zingah hripui vei tawh lo an awm nual bawk.

Sorkar thuchhuah tarlan danin, Thawhṭannia ZMC-a mi 503 (mipa 391 leh hmeichhia 112)-te swab sample endik zingah mi 30, mipa 22 leh hmeichhia pariatin Covid-19 an vei a, mi 473 an fihlim. Rapid Antigen Test (RAT) hmanga mi 1,043 endik zingah hripui vei panga hmuh a ni bawk. Lunglei Civil Hospital (LCH) laboratory-a mi 20 endik zingah hripui vei an awm lo thung.

August 24-a ZMC laboratory-a Covid-19 vei hmuh thar mi 30-te chu Melriat khaw mi 14, Ramhlun South veng mi pakua leh Falkawn khaw mi pakhatte chu Mizoram chhunga kai nia hriat an ni a; Melriat mi zingah naupang kum 7 mi leh puitling kum 78 mi an tel.

ZMC-a hmuh chhuah dang parukte chu mipa kum 31-56 inkar, Assam leh Meghalaya aṭanga rawn lutte an ni a, BSF sipai pakhat a tel. Anni hi quarantine facility-a awm lai vek an ni. Rapid Antigen Test hmanga Covid-19 vei hmuh chhuah mi pangate chu mipa pali leh hmeichhia pakhat niin, state pawn aṭanga tun hnaia rawn lut vek an ni.

RAT hmanga hmuh chhuah thar mipa pahnih, kum 25 leh 41, Mamit district-a mi, Assam aṭanga lo haw ve ve an ni a, harsatna an nei lo (Covid-19 symptom an nei lo). Aizawl district-a mi hmeichhia kum 25-a upa, West Bengal aṭanga lo hawin a vei bawk a, ani hi symptom nei a ni. Kolasib district (Vairengte)-ah hripui vei hnam dang driver/handyman pahnih, Assam lam mi hmuh chhuah a ni bawk a, symptom an nei lo.

RAT hmangin Thawhṭanni khan Siahaah mi pahnih, Lawngtlaiah mi pahnih leh Hnahthialah mi pathum endik a ni bawk. August 24, Thawhṭanni tlai dar 5 leh nimin zing dar 5 inkara Vairengte checkgate-a RAT hmanga swab sample endikah Covid-19 vei hmuh an awm lo a; nimin zing dar 5 leh tlai dar 5 inkara mi 249 endiknaah hripui vei hnam dang pathum hmuh chhuah a ni thung. Hripui vei hmuh chhuah thar zingah harsatna nei an awm lo.