Quarantine centre-a awm mekte centre-a vote thlâktir turin rawt

Covid-19 Medical Operation Team chairman Dr ZR Thiamsanga, MLA hoa nimina meeting chuan, quarantine centre-a awmte'n vote an thlâk theih dan tur an rél a; khung hranna hmuna vote thlaktír rawtin, an rawtna chu nimin khan State Election Commission (SEC)-ah an thlen.

SEC-in rawtna thlen tura a ngenna bawhzuiin Dr ZR Thiamsanga ho hian sorkar official-te an ṭhukhawm a, an thurelte chu SEC-ah an thlen nghal a ni. Ṭhutkhawmnaah hian, quarantine centre-a awmte chu Covid-19 incubation period ni 14 awm tura tih an nih thu leh RT-PCR result-ah false negative 30% (negative anga hmuhte zingah dik lo zaa 30) a awm theih avangin, negative-te pawh an quarantine period a la zawh loh chuan an him ngei a ni tih sawi fak theih a nih loh thu tarlan a ni.

Meeting chuan, quarantine centre-a awm zawng zawngte chu an awmna hmunah postal ballot hmanga vote thlaktir turin SEC-ah rawtna an thlen a; vote thlakna báwm la tur leh vote chhiar turte chu Health department-in PPE a ngaihtuahsak thei dawn a ni.