Lalsawta'n car lei a sawifiah
Finance minister Lalsawta chuan, tun hnaia sorkarin motor thar a leite chu minister-te hman atana tih a ni lo niin a sawi.
Lalsawta hian nimin khan Congress Bhavan-ah thu sawiin, "Motor lei tharte kha official-ho hman tura tih a ni. Mahse, official lamin 'In motor kum nga in hmang tawh a, kawl zawk rawh u' an tih avangin kan hmang zawk a ni," a ti a; minister ho motor-te chu official-te'n an hmang ta zawk niin a sawi.
Motor leina atana ruahman cheng nuai 342 chu hman zawh a la ni lo tih sawiin Finance Minister chuan, "Motor hi lei tura tih zat kan la lei lo," a ti.
Lalsawta chuan, thla tin hlawh la chi tihpun lamah sorkar a fimkhur hle tih sawiin, "Tunah hian police-ah ringawt pawh post ruak 1,600 vel a awm a ni," a ti a; sorkar fet tak, uikawm tak, taima tak leh mipuite tana ram ṭha siam tur din a pawimawh tih a sawi bawk.