MNF-in February 25-ah Bandh an huaihawt dawn

MNF party chuan February 25, Nilaini khian Mizoram pum huapin darkar 12 awh 'Mipui thlavang hauh­na kawngzawh' an huaihawt dawn.

MNF senior vice president Tawnluia hoa MNF Action Committee-te nimina Mizo Hnam Runa ṭhukhawm chuan February 25, 2015-a total bandh huaihawt an rel a; zing dar 5 aṭanga tlai dar 5 thleng a awh ang. MNF hian February 12, 2015 khan total bandh huaihawt an tum tawh a, mahse zirlaite ngenna avangin an sawn hlá a ni.

Tawnluia chuan, school calen­der an en a, zirlaite an khaihlak lohna tur ngaihtuah chungin ruahmanna an siam tih a sawi a; kohhran pawl hrang hrangte hun pawimawh nena insu buai lo tur leh, sorkar department hun pawimawh bik vanga loh theih loha ṭhulh ngai an awm leh a awm lohte an zir chian hnuah February 25, 2015 chu total bandh neih ni atan an ruat ta tih a sawi.

Hetih lai hian, total bandh neih hun tur chu Chakma Autonomous District Council chhunga V/C inthlan ní a nih chungchangah chuan, CADC area bika awm dan tur chu ngaihtuah ṭhat leh atan an dah tih a sawi bawk.

Nimina Mizo Hnam Runa inkhawmah thu sawiin, Tawnluia chuan, Tripura camp-a Bru raltlante chu fimkhur leh uluk taka Mizorama lak luh an ṭul thu a sawi a, "Supreme Court order anga thla ruk chhunga lak luh tur tih a nih rualin, kum 1995 Electoral Roll hmanga Mizoram khua leh tui dik takte leh an thlahte chauh lak luh ni rawh se," a ti.

MNF sr. vice president chuan, Myanmar, Manipur, Nagaland leh Tripura state-a remna leh muanna a awm remti lo ang maia thuchhuah siamah Congress party a puh a; Congress party press release siam duh dan chu Kristiante tih atana thil inhmeh lo niin a sawi bawk.