Helho rûkbote chhanchhuak turin Bangladesh-ah police tirh tum hman

Home minister R Lalzirliana chuan, tun hnaia NLFT-te'n Mizo­ram aṭanga mi pahnih an rûkbo chhan chhuak turin Bangladesh-ah Mizoram police-te tirh luh an tum hman thu a sawi.

Nimin Congress Bhavan-a inkhawmah thu sawiin, R Lal­zirliana chuan, "NLFT-te hian Tripura sorkar nena an inbiak­na turah dodalna (objection) siam lo turin min ngen a, Mizo fate rûkbo tawh loh an intiam a ni. Tun hnaia mi pahnih an rûkbo pawh khan hnam dang vek emaw an ti a nih a rinawm. Mahse, Mizoram hmasawnna hna thawka awm hnam dang rûkbo pawh hi kan duh lo a, kan mi leh sate rubo ang thoah kan ngai a ni," a ti.

Home Minister chuan, inrûkbona a thlen ṭumin Bangladesh-a luh phalna sorkar laipuiah an dil tawh tih sawiin, "Bangladesh official rawn zin pawh Mizoram aṭanga NLFT-in mi an rûkbo a, chhanchhuah hna thawk tura an ramah luh phalna kan dil a, mahse, Bangladesh official-te'n phalna inpek chi a nih loh thu an sawi a ni," a ti a; sorkar laipui leh Bangladesh official-te'n Bangladesh-a luh an phal loh thu an sawi dawt loh avanga, ziak loh phalna nei anga an inngaih thu a sawi.

Tun hnaia NLFT-te'n mi pa­hnih an rûkbote chu intiamkamna awm loa chhuah an nih vat loh chuan NLFT-te hi luhchhuah an tum thu sawiin R Lalzirliana chuan, "Intiamkamna awm loa an rawn chhuah hnuah pawh NLFT-te bûk luh chhuah kan rilrûk a ni. An awmna pawh kan hre vek tawh. Kan police-te phûr viau tawh mah se, Pathian kan râwn hnuin kan ṭhulh leh a ni," a ti.

R Lalzirliana chuan NLUP chungchang sawiin, "Opposition party-te hian NLUP hi an hêk lo ang tih a hlauhawm. An hêk avang hian NLUP hi a rawn vul thar leh phah a ni," a ti a; NLUP hêk a zarah NLUP anga ṭha ngaihtuah chhuah phah a niin a sawi.