NEEPCO nena MoU ziah sût an duh

PRISM chuan thuchhuah siamin, Mizoram sorkarin Tuivai Hydro Electricity Project, megawatt 210 siam tura NEEPCO inremna a ziahpui tawh chu sût leh se an duh thu an tarlang.

Sorkarin tute emaw Memo­randum of Under­standing a ziahpui dawn­in MoU tur chu Law & Judicial department-in a enfiaha a pawm (vet) a ngai nia sawiin, PRISM chuan, Tuivai HEP atana Mizoram sorkar leh NEEPCO MoU chu Law & Judicial-in an enfiah loh leh pawmpui loh a niin an sawi a, "Mizoram Power Policy-a hetiang atana MoU tur duan sa awm nen a inang lo a, an MoU ziah hi dan kalh a ni," an ti.

PRISM chuan, NEEPCO-in Tuirial Hydel Project (60 MW) siam hna an thawk mek a, hna thawh zawh hun tura ruahmanah an thawk zo hman lo tawh niin an sawi a; NEEPCO vek hi Lungreng HEP (815 MW), Chhimtuipui HEP (635 MW) leh Mat HEP (76 MW) te siam tur­in Mizoram sorkarin kum 2011-ah MoU a ziahpui tawh tih sawiin, "Heng HEP pathumah hian hna an thawh hmuh tur pakhatmah a la awm lo a, heng vang hian NEEPCO hi hna pek tlakah kan ngai lo," an ti.

PRISM chuan, kawl­phetha siamna turah kum 2008 leh 2012 inkarah Mizoram sorkarin company hrang hrang MoU pakua a ziahpui tawh a, mahse pakhatmah awmze neia bawhzui a awm lo niin an sawi bawk.