Khawpui pariatah BPL chhungkua 27,598 an awm

Kum 2013-14 chhung khan Mizorama khawpui pariatah Below Poverty Line (BPL) chhungkua 27,598 an awm a, chung chhungkua 27,598-ah chuan mihring 1,21,614 an awm. Kum 2011 chhiarpuiah khawpui pariatah mihring 5,71,771 an awm a; khawpuia cheng zinga mi 21.27% chu BPL an ni tihna a ni.

State khawpui Aizawl leh district headquarters pasarih zingah mihring awm zat aṭanga tehin Saiha khawpuiah BPL chhungkua tam ber a, khawpui mihring zawng zawng zinga 28.97% chu BPL an ni. Mamit district-ah BPL an tlem ber thung a, Mamit khawpuia cheng zinga 15.24% chu BPL an ni.

Planning Commission chuan July 2013 khan thingtlang leh khawpuia chengte sum lak luh azirin BPL ni thei chin a bithliah a; thingtlangah chuan mi pakhatin ni khata Rs. 27 la lut lote chu BPL an ni a, khawpuiah chuan ni khata Rs. 33 la lut lote BPL huangah dah an ni thung.