State Olympic Association an thukhawm

Mizoram State Olympic Association (MSOA) chuan, nimin khan CMO conference hall-ah Annual General Meeting 2016 an nei a, an president, chief minister Lal Thanhawla'n a kaihruai.

CM Lal Thanhawla chuan, Mizoramin infiamna chi hrang hrangah India ramah hriat a hlawh chho mek a, khawvel leh ram pum huapa Mizo infiammite'n hming an chher mek chu lawmawm a tih thu a sawi a, "Hlawhtlinna kan chan chhan hi sport association-te inpekna leh infiammite thawhrimna vang a ni," a ti.

Infiamna lamah kawng hrang hrangin hmasawnna awm mah se, hmasawnna tur tam tak a la awm thu sawiin MSOA President chuan, "Mizoramin infiamna chi hrang hrangah theihna an nei a ni tih ram pumin a hre chho mek a, football-ah phei chuan football factory tih hial khawpin Mizoram hming a thang mek a ni," a ti a; discipline hrang hrangah rualkhai takin hmasawnna awm se a duh thu a sawi.

Meeting-ah hian Sports Miniser leh MSOA senior vice president Zodintluanga chuan, hockey tihnun thar lehna (revival) atan Tlangnuam leh Luangmual khelmualte en mek a nih thu te; district capital tinah district sports academy siam turin ngaihtuahna neih mek a nih thu te; Saitual leh Hnahthialah football khelh nan artificial turf phah tura hmalakna a awm thu te a report a. Mizoramin sport discipline hrang hrangah tun aia nasa zawka hlawhtlinna a hmuh theihna atana hmalakna turte an sawiho.

Meeting zawhah Olympic Day (June 23) pualin 'Olympic-ah Mizote engtin nge kan tel ve theih ang?' tih thupui hmangin seminar neih a ni a, MSOA treasurer Dr Lalrinawma Hnamte-in a lem nen seminar neih chhan a sawifiah.

MSOA hi kum 1986-ah Aizawl ah din a ni a, Indian Olympic Association hnuaia inziak lut an ni.

MSOA-ah hian state level sport association 16 - athletics, badminton, basketball, boxing, football, hockey, judo, table tennis, tennis, taekwondo, volleyball, weightlifting, wrestling, rifle, fencing. archery - an awm mek a ni.