MULCO-in inkhawmpui an hmang

Mizoram Milk Producers Cooperative Union (MULCO) chuan nimin khan Vety Polyclinic conference hall-ah General Assembly an hmang a, AH&Vety minister C Ngunlianchunga'n a hmanpui.

C Ngunlianchunga chuan, bawng vulhtute chu an bawng-hnute thar chhuah ang ang MULCO hnen-a chhûng turin a ngen a, "Buai-pui tham bawnghnute in chhûn chuan sorkarin a tih tur a tih ve ang. Rei zawk bawnghnute vawn ṭhatna tur pawh sorkarin a ngaihtuah mek a, ran chaw lama harsatna pawh chingfel tura ṭan lak a ni," a ti.

Inkhawmpui hi MULCO chairman Vanlalchhunga'n a kaihruai a, registrar of cooperative societies Sangdingliana leh AH&Vety director Dr Saingura Sailo te pawhin thu an sawi.

Assembly-a tarlan danin, MULCO hian an bawnghnute lei khawmte chu an sawngbawl hnuah sale agent 204 leh sale outlet 10 kaltlangin litre khat Rs. 50-in an hralh chhuak a, litre khatah agente-te'n Rs. 2 an hlêp. Kum 2015-16 chhung khan bawng-hnute hralh aṭangin Rs. 9,34,96,177 an hmu a, bawnghnute aṭanga thil siam chhuah hralhna aṭangin Rs. 2,03,20,088 an hmu bawk.