Hmasawnna tak tak thlen turin Neitu thinlung put a ṭul : Lalsawta

Finance minister Lalsawta chuan, Mizoram hmasawnna tak tak thlentir tur chuan ram neitu thinlung pûa mipuite'n tih tak zeta hna an thawh a ngaih thu a sawi.

Nilaini khan Lalsawta hian Baktawng khuaa Chhuanthar hmun a tlawhnaah thu sawiin, "Hmasawnna chu thawhrimna leh tih tak takna aṭangin a inṭan ṭhin. Mizoram hmasawnna tak tak thlentir tur chuan ram neitu thinglung púin mipuite'n tih tak zeta hna kan thawh a, inchâwm zo ṭâwk ṭâwk aṭangin mahni dehchhuah hralh chhuah khawpah kan inleh a ngai," a ti.

Finance Minister chuan, Mizoram hmasawnna turin sorkarin theihtawp a chhuah zel tih sawiin, "Mipuite nena ṭanghoa beih tak tak a ngai a, kut hnathawktute leh rahbi tleu tawhte tun din leh nana NLUP kalpui mek tichaktu tur New Economic Development Policy duan mek a ni," a ti a; NEDP chu Mizote hausakna leilâwn pawimawh tak a ni dawn niin a sawi.

Chhuantharah hian Minister ho hian carpentry, bél chhûn, vawk leh bawng vulh, thingpui fe siam leh eizawnna péng hrang hrang an neihna hmunte an tlawh a ni.

Sorkar thuchhuah tarlan danin, Baktawnga Chhuantharah hian chhungkua 360 awmin, mi 2,180 an cheng. Chhuanthar hotute chuan, hlawhtlinna an hmuhna chhan bul ber chu ram neitu, cheitu, enkawltu leh venghimtu thinlung púa hna an thawk leh hmasawn an tum zel vang a nih thu Minister Lalsawta an hrilh.