Covid-19 vei hmuh thar mi 35 zingah Mizorama kái chhâwng mi 24 an awm

August 24, Thawhṭannia Mizorama Covid-19 vei hmuh chhuah mi 35 zingah Mizoram chhunga mi dang aṭanga kai (positive contact) mi 24 an awm. Chu'ng zingah chuan Melriat khaw mi 14 telin, ṭum khata khaw (VC) pakhat chhunga hripui vei hmuh chhuah tam ber ṭum a ni.

Sorkar thuchhuaka a lan danin, Melriat khuaa hripui vei hmuh chhuah thar mi 14-te chu an khuaa cheng mek vek niin, mipa pariat leh hmeichhia paruk an ni a, an zingah naupang kum 7 mi, kum 9 leh upa lam tawh kum 78 mi an tel. Anni hi August 22, 2020-a an khuaa mipa pahnih hripui vei hmuh chhuah tawhte aṭanga kai chhawnga ngaih an ni. Naupang kum 9 miin harsatna a nei a, mi dang zawngin symptom an nei lo.

Zangena Filling Sta­tion-a thawk zinga pakhatin Covid-19 a vei tih August 20-a hmuh chhuah a nih hnua a kài chhàwn theih awma ngaihte chhui zuina leh an swab sample endikna aṭangin hripui vei mi pakua, mipa pasarih leh hmeichhia pahnih hmuh chhuah a ni a; Ramhlun South veng mi pariat (mipa paruk leh hmeichhia pahnih) kum 23-42 inkarte leh Falkawna mipa kum 42 mite an ni. An vai hian harsatna an nei rih lo. Ramhlun South-a Covid-19 vei hmuh chhuah thar dang pakhat, mipa kum 42 mi pawh Mizorama positive contact aṭanga kai a ni a, ani hi Rangvamuala kalte chhuina kal zela in lama inkhung lai, swab sample endiksak a ni.

Melriat Village Task Force (VTF) secretary Marcelus Lalṭanpuia (YMA secretary) chuan Vanglaini palai zawhna chhángin, Thawhṭannia ZMC-a swab sample endik zingah an khaw mi 31 an tel thu a sawi a, "Tuna positive tate hi a hmaa positive kan neih tawh mi pahnihte chhungkhat hnaivai an ni hlawm. An zingah VTF-a duty ṭhin mi pahnih an tel," a ti a; hripui vei hmuh thar mi 14 zingah naupang/tleirawl kum 7, 9, 11, 12 leh 14 mite an tel thu a sawi.

Marcelus Lalṭanpuia chuan, an khaw mite chuan taksaah harsatna an nei rih lo tih sawiin, "Ngaihtuahawm an awm rih lo. ZMC lamah lak phei an ni a, zirlaite phei chu an zirlaibute nen an lut phei a ni," a ti.

Covid-19 vei mi 14 hmuh chhuah thar vangin contact tracing an tih nghal rih loh thu sawiin Marcelus Lalṭanpuia chuan, "Tunah chuan inchhui zui vak ngaihna a awm rih lo. A hmaa contact tracing kan tiha swab test ngai mi 100 vel an la awm a, vawiin (Thawhlehni) hian sample an rawn lak kan beisei," a ti. Swab sample test ngai zingah hian VTF Secretary pawh hi a tel a ni.

Covid-19 vei mi pakua hmuh tharna Ramhlun South YMA president K Lalremruata, Local Task Force (LTF) chairman chuan, an vengah Zangena Filling Station-a kal leh Rangvamuala kal an awm ve avangin mi 20-te swab sample endik a nih thu leh, chu'ng zinga pakua chuan hripui an vei tih hmuh chhuah a nih tâk thu Vanglaini a hrilh. Zawhna chhangin K Lalremruata chuan, mi pakua zingah LTF office nghaktu ber an treasurer a tel thu leh LTF volunteer dang pathum an tel thu a sawi a, "LTF duty zinga ṭhenkhat hi Zangena petrol pump-a petrol late an ni," a ti a; an venga hripui vei hmuh tharte'n an kài chhàwn theih àwmte nimin khan an chhui zui nghal a, niminah chuan swab sample lâk a nih dawn rih loh thu a sawi.

Ramhlun South YMA President chuan, August 23, Pathianni khan mitthi an nei tih sawiin, "Mitthi in leh vuinaa che vêlah LTF mi leh sa, tuna Covid-19 vei hmuh tharte pawh an tel a, veng dang aṭanga rawn kalte pawh an awm a, inchhui a awlsam dawn lo khawp mai," a ti. Thu dawn danin, Ramhlun South-a hripui vei hmuh tharte hi kum 23-42 inkar, chhungkaw hranga mi vek an ni. Falkawn VTF secretary Zairem­mawia (YMA secretary) chuan zawhna chhángin, an khaw mi pakhat, hripui vei hmuh thar a nih avangin an khua bikah chuan chhui zui vak ngai a awm loh thu a sawi a, "Amah hi a invawng a, inchhui vak a ngai lo. An chhungkuaa mite erawh chu vawiin (Thawhṭanni) khan swab sample lak a ni," a ti.

Zairemmawia chuan, an khaw pain hripui a kai ṭanna chu Zangena Filling Station a nih an rin ber thu a sawi rualin, chawhnu dar 1 vela kal a nih avangin a nih loh ve theih thu a sawi.Falkawna Covid-19 vei hmuh thar chuan social media lamah a chanchin a tarlang a, "Kei hi Pu Lalnuntluanga s/o Sapdawla, Falkawn Hospital Veng Section-a awm ka ni a. Dt 18/8/20 khan ka pa thisen test tirin Cancer Hospital-ah ka kal a, ka haw lam dar 1:00 velah Zangena petrol pump ka thleng a, petrol ka thun a, ka haw nghal. Dt. 20/8/20-ah petrol pump-ah positive an awm tih ka hria a, task force-ah ka in report nghal... inkhung ṭhaa ka hriat avang­in ka inkhung a, ka chhuak ta miah lo. Niminah ka sample an han la, result a lo chhuak, ka lo positive ta si a, a pawi ka ti tak zet a, khawtlang mipui ka tichiai nasa hle mai a, in mi hriatthiamna leh ṭawngṭaipuina ka ngen e," a ti.