Lunglei CH-a RT-PCR khawl enfiah

Congress Legislature Party (CLP) leader Zodintluanga Ralte leh Lunglei District Congress Committee (LDCC) hruaitute chuan nimin khan Lunglei Civil Hospital (LCH) an tlawh a; Zodintluanga'n LCH laboratory-a dah tur RT-PCR khawl a pêk tawh dinhmun an enfiah.

MLA Zodintluanga Ralte chuan, Covid-19 chu Aizawlah chuan mipui vantlangah a darh ṭan meka a lan thu sawiin, "Lung­lei bik kan la him rih niin a lang a, amaherawhchu, Lung­lei, Lawng­tlai leh Siaha district mite hi kan him chiah em? Test kan la tih tam loh avang hian him rih mai niin kan lang em, tih hi ngaihtuah ngai tak a ni," a ti a; Cachar district-ah ringawt pawh ni khatah mi sing chuang an endik theih tawh laia TrueNAT ringawta innghah chu a him loh theih thu a sawi.

Hripui donaah vuaicha lutuk a hlauhwm tih sawiin Zodin­tluanga chuan, "A náwlpuia test-na kan neih vat a ṭul em em a ni. MNF Sub-Hqtrs, Lunglei hruaitute pawhin RT-PCR hman ṭangkai thuai theih a ni ang tih media mite hmaa an sawi ang ngeiin, a rang thei ang berin a taka hmang ṭangkai turin sorkar kan phût a ni," a ti. LDCC vice president KL Chhawnzauva chuan, Covid-19 hri kài leh kài loh enna tura Zodintluanga'n RT-PCR a pek tawh chu LCH-a an enkawl dan leh Mizoram sorkarin hman tangkai a tum dante ngaihvena kal an nih thu a sawi a, "Co­vid-19 in min chên chilh lai leh mi tin kan rálkhelh laia hman loha dah mai mai a ni hi a pamhmai kan ti hle," a ti a; ṭangkai taka hmang turin Mizoram sorkar an ngen tih a sawi.

RT-PCR khawl hi June thlaa Zodintluanga Ralte-in a pek ang angin, a tuamna phelh lohin LCH building chhâwng chung, Psychiatric Ward-ah dah a la ni a, a part ṭhenkhat, deep freezer-a dah ngaite erawh chu vúr báwmah an dah thung. Khawl ennaah hian MLA hlui PC Lalthanliana leh Joseph Lalhimpuia te pawh an tel a ni.