AR hotu leh MSU an inkâwm

Assam Rifles 23rd Sector DIG Brig. Vinod S-a'n léng tura a sàwm angin August 24, Thawhṭanni tlai khan Mizo Students Union (MSU) hruaitute an lêng a, AR leh Mizo mipui inkar chungchang an sawiho.

MSU tarlan danin, AR chu 'Tlang mite ṭhian' an intih ang ngeia Mizoram tana thawk tur leh Sesih leh Vairengtea an chêt dan avanga thupha chawi tura an duh thu leh Covid-19 lêng kaihhnawiha Mizoram sorkarin dan leh thupek a siamte zâwm tura an duh thu an sawi.

Brig. Vinod S pawhin, Mizo mipui rilru tihnat an duh loh thu leh social media-a thu a darh vak chu ṭha a tih loh thu sawiin, Mizote rilru an tina palh a nih chuan ngaihdam a dil thu a sawi a; Mizote tan an inhawn thu te, harsatna chinfel kawng­ah a inpeih reng thu te, AR mi leh sa Mizo mipui laka pawisawi an awm a nih a, finfiah a nih phawt chuan a na thei ang bera hrem an nih tur thu te, Covid-19 donaah Mizo mipui him nan Mi­zo­ram sorkar nen thawhho zel a duh thute a sawi bawk.